GADVASU ਵੱਲੋਂ 18 ਸਤੰਬਰ ਨੂੰ ਲੱਗੇਗਾ Pashu Palan Mela, ਉੱਤਮ ਨਸਲਾਂ ਦੀ ਹੋਵੇਗੀ ਪ੍ਰਦਰਸ਼ਨੀ

ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਐਨੀਮਲ ਸਾਇੰਸਿਜ਼ ਯੂਨੀਵਰਸਿਟੀ (GADVASU), ਲੁਧਿਆਣਾ ਵੱਲੋਂ 18 ਅਤੇ 19 ਸਤੰਬਰ ਨੂੰ ਦੋ ਰੋਜ਼ਾ “Pashu Palan Mela” ਕਰਵਾਇਆ ਜਾ ਰਿਹਾ ਹੈ। ਇਸ ਮੇਲੇ ਨੂੰ ਲੈ ਕੇ ਪਸ਼ੂ ਪਾਲਕਾਂ ਵਿੱਚ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਹੈ। ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ. ਜਤਿੰਦਰ ਪਾਲ ਸਿੰਘ ਗਿੱਲ ਨੇ ਕਿਹਾ ਕਿ ਇਹ ਮੇਲਾ ਪਸ਼ੂ ਪਾਲਕਾਂ ਅਤੇ ਡੇਅਰੀ ਸੈਕਟਰ ਨਾਲ ਜੁੜੇ ਲੋਕਾਂ ਲਈ ਨਵੀਆਂ ਤਕਨੀਕਾਂ ਸਿੱਖਣ ਦਾ ਅਹਿਮ ਮੰਚ ਬਣ ਗਿਆ ਹੈ। ਇਸ ਵਾਰ ਮੇਲੇ ਦਾ ਮੁੱਖ ਥੀਮ “ਜੈਵਿਕ ਸੁਰੱਖਿਆ ਮਜ਼ਬੂਤ ਕਰੋ-ਪਸ਼ੂਆਂ ਦੀਆਂ ਬਿਮਾਰੀਆਂ ਦੀ ਰੋਕਥਾਮ ਕਰੋ” ਰੱਖਿਆ ਗਿਆ ਹੈ, ਤਾਂ ਜੋ ਪਸ਼ੂ ਪਾਲਕਾਂ ਨੂੰ ਜੈਵਿਕ ਸੁਰੱਖਿਆ ਪ੍ਰਬੰਧਾਂ ਪ੍ਰਤੀ ਜਾਗਰੂਕ ਕੀਤਾ ਜਾ ਸਕੇ।

ਮਾਹਿਰਾਂ ਨਾਲ ਰਾਬਤਾ ਅਤੇ ਤਕਨੀਕੀ ਸੈਸ਼ਨ

ਡਾਇਰੈਕਟਰ ਪਸਾਰ ਸਿੱਖਿਆ ਡਾ. ਰਵਿੰਦਰ ਸਿੰਘ ਗਰੇਵਾਲ ਨੇ ਇਸ ਮੇਲੇ ਬਾਰੇ ਜਾਣਕਾਰੀ ਸਾਂਝੀ ਕਰਦਿਆਂ ਕਿਹਾ ਕਿ ਪੰਜਾਬ ਅਤੇ ਗੁਆਂਢੀ ਰਾਜਾਂ ਤੋਂ ਵੱਡੀ ਗਿਣਤੀ ਵਿੱਚ ਕਿਸਾਨ ਪਹੁੰਚਣ ਦੀ ਉਮੀਦ ਹੈ। ਇਸ ਮੇਲੇ ਦੌਰਾਨ, ਕਿਸਾਨਾਂ ਨੂੰ GADVASU ਦੇ ਵਿਗਿਆਨੀਆਂ ਨਾਲ ਸਿੱਧੇ ਤੌਰ ‘ਤੇ ਗੱਲਬਾਤ ਕਰਨ ਦਾ ਮੌਕਾ ਮਿਲੇਗਾ। ਦੋਵਾਂ ਦਿਨਾਂ ਦੌਰਾਨ ਵਿਗਿਆਨਕ ਢੰਗ ਨਾਲ ਪਸ਼ੂ ਪ੍ਰਬੰਧਨ, ਮੁਨਾਫ਼ੇਯੋਗ ਡੇਅਰੀ ਫਾਰਮਿੰਗ, ਮੱਛੀ ਪਾਲਣ ਅਤੇ ਮੁਰਗੀ ਪਾਲਣ ‘ਤੇ ਵਿਸ਼ੇਸ਼ ਤਕਨੀਕੀ ਸੈਸ਼ਨ ਕਰਵਾਏ ਜਾਣਗੇ, ਜਿਸ ਨਾਲ ਕਿਸਾਨਾਂ ਨੂੰ ਉਤਪਾਦਕਤਾ ਅਤੇ ਆਮਦਨ ਵਧਾਉਣ ਲਈ ਆਧੁਨਿਕ ਅਭਿਆਸਾਂ ਨੂੰ ਅਪਣਾਉਣ ਵਿੱਚ ਮਦਦ ਮਿਲੇਗੀ। ਇਸ ਤੋਂ ਇਲਾਵਾ, ਸਵਾਲ-ਜਵਾਬ ਸੈਸ਼ਨਾਂ ਰਾਹੀਂ ਕਿਸਾਨ ਆਪਣੀਆਂ ਖੇਤੀ ਗਤੀਵਿਧੀਆਂ ਵਿੱਚ ਆਉਣ ਵਾਲੀਆਂ ਚੁਣੌਤੀਆਂ ਬਾਰੇ ਮਾਹਿਰਾਂ ਤੋਂ ਸਿੱਧੇ ਹੱਲ ਪ੍ਰਾਪਤ ਕਰ ਸਕਣਗੇ।

ਉੱਤਮ ਨਸਲ ਦੇ ਪਸ਼ੂ ਅਤੇ ਪ੍ਰਦਰਸ਼ਨੀਆਂ

ਇਸ ਮੇਲੇ ਦਾ ਮੁੱਖ ਖਿੱਚ ਦਾ ਕੇਂਦਰ GADVASU ਦੇ ਫਾਰਮਾਂ ਵਿੱਚ ਪਾਲੇ ਗਏ ਉੱਚ-ਗੁਣਵੱਤਾ ਵਾਲੇ ਪਸ਼ੂਧਨ ਦੀ ਪ੍ਰਦਰਸ਼ਨੀ ਹੋਵੇਗੀ, ਜਿਸ ਤਹਿਤ ਉੱਤਮ ਨਸਲ ਦੀਆਂ ਗਾਵਾਂ, ਮੱਝਾਂ, ਬੱਕਰੀਆਂ ਅਤੇ ਪੋਲਟਰੀ ਪੰਛੀ ਦਿਖਾਏ ਜਾਣਗੇ। ਇਸ ਨਾਲ ਕਿਸਾਨਾਂ ਨੂੰ ਨਸਲ ਸੁਧਾਰ ਅਤੇ ਬਿਹਤਰ ਸੀਮਨ ਦੀ ਵਰਤੋਂ ਕਰਨ ਦੀ ਪ੍ਰੇਰਨਾ ਮਿਲੇਗੀ। ਯੂਨੀਵਰਸਿਟੀ ਵੱਲੋਂ ਡੇਅਰੀ, ਬੱਕਰੀ, ਸੂਰ, ਮੱਛੀ ਅਤੇ ਪੋਲਟਰੀ ਫਾਰਮਿੰਗ, ਪਸ਼ੂ ਪਾਲਣ ਨਾਲ ਜੁੜੀਆਂ ਕਿਤਾਬਾਂ, ਪੈਕੇਜ ਆਫ ਪ੍ਰੈਕਟਿਸਿਜ਼ ਅਤੇ ਪ੍ਰਸਿੱਧ ਰਸਾਲਾ ‘ਵਿਗਿਆਨਕ ਪਸ਼ੂ ਪਾਲਣ’ ਵੀ ਕਿਸਾਨਾਂ ਲਈ ਉਪਲਬਧ ਕਰਵਾਇਆ ਜਾਵੇਗਾ।

ਮੁਫ਼ਤ ਟੈਸਟਿੰਗ ਸਹੂਲਤਾਂ ਅਤੇ ਵਿਸ਼ੇਸ਼ ਉਤਪਾਦ

ਡਾ. ਰਵਿੰਦਰ ਗਰੇਵਾਲ ਨੇ ਦੱਸਿਆ ਕਿ ਯੂਨੀਵਰਸਿਟੀ ਵੱਲੋਂ ਤਿਆਰ ਕੀਤੇ ਖ਼ਣਿਜ ਮਿਸ਼ਰਣ, ਯੂਰੋਮਿਨ ਲਿਕ ਅਤੇ ਬਾਈਪਾਸ ਫੈਟ ਵਾਜਬ ਕੀਮਤਾਂ ‘ਤੇ ਉਪਲਬਧ ਹੋਣਗੇ। ਇਸ ਦੌਰਾਨ ਤੂੜੀ ਅਤੇ ਪਰਾਲੀ ਨੂੰ ਯੂਰੀਆ ਸੋਧਣ ਦੇ ਤਰੀਕੇ, ਟੀਟ ਡਿੱਪ ਅਤੇ ਚਿੱਚੜਾਂ ਦੀ ਰੋਕਥਾਮ ਦੇ ਲਾਈਵ ਪ੍ਰਦਰਸ਼ਨ ਵੀ ਦਿਖਾਏ ਜਾਣਗੇ। ਕਿਸਾਨਾਂ ਦੀ ਸਹੂਲਤ ਲਈ ਮਸਟਾਇਟਿਸ (ਸਣ ਰੋਗ), ਅੰਦਰੂਨੀ ਪਰਜੀਵੀ, ਦੁੱਧ, ਫੀਡ ਅਤੇ ਪੱਠਿਆਂ ਵਿੱਚ ਨਾਈਟ੍ਰੇਟ ਜ਼ਹਿਰੀਲੇਪਣ ਦੀ ਮੁਫ਼ਤ ਜਾਂਚ ਕੀਤੀ ਜਾਵੇਗੀ। 

ਕਿਸਾਨ ਬਿਮਾਰੀ ਦੀ ਜਾਂਚ ਲਈ ਖ਼ੂਨ, ਗੋਹਾ, ਪਿਸ਼ਾਬ ਅਤੇ ਚਮੜੀ ਦੇ ਨਮੂਨੇ ਲਿਆ ਸਕਦੇ ਹਨ। ਇਸ ਦੇ ਨਾਲ ਹੀ, ਪਸ਼ੂਆਂ ਅਤੇ ਮਨੁੱਖਾਂ ਦੋਵਾਂ ਲਈ ਬਰੂਸਿਲੋਸਿਸ ਟੈਸਟਿੰਗ ਦੀ ਸਹੂਲਤ ਵੀ ਉਪਲਬਧ ਹੋਵੇਗੀ। ਦੁੱਧ ਵਿੱਚ 5 ਆਮ ਮਿਲਾਵਟਾਂ (ਖੰਡ, ਸਟਾਰਚ, ਯੂਰੀਆ, ਨਿਊਟ੍ਰਲਾਈਜ਼ਰ ਅਤੇ ਹਾਈਡ੍ਰੋਜਨ ਪਰਆਕਸਾਈਡ) ਦਾ ਪਤਾ ਲਗਾਉਣ ਲਈ GADVASU ਦੀ ਕਿੱਟ ਵੀ ਵਿਕਰੀ ਲਈ ਰੱਖੀ ਜਾਵੇਗੀ।

ਕੰਪਨੀਆਂ ਦੇ ਸਟਾਲ ਅਤੇ CM ਐਵਾਰਡ

ਇਸ ਮੇਲੇ ਵਿੱਚ ਫਾਰਮਾਸਿਊਟੀਕਲ, ਪਸ਼ੂ ਖ਼ੁਰਾਕ, ਦਵਾਈਆਂ, ਮਸ਼ੀਨਰੀ, ਚਾਰੇ ਦੇ ਬੀਜ ਅਤੇ ਸੀਮਨ ਉਤਪਾਦਨ ਨਾਲ ਜੁੜੀਆਂ 100 ਤੋਂ ਵੱਧ ਨਾਮਵਰ ਕੰਪਨੀਆਂ ਆਪਣੇ ਸਟਾਲ ਲਗਾਉਣਗੀਆਂ। ਪਸ਼ੂ ਪਾਲਣ ਦੇ ਖੇਤਰ ਵਿੱਚ ਵਿਲੱਖਣ ਪ੍ਰਾਪਤੀਆਂ ਕਰਨ ਵਾਲੇ ਅਗਾਂਹਵਧੂ ਕਿਸਾਨਾਂ ਨੂੰ ਉਤਸ਼ਾਹਿਤ ਕਰਨ ਲਈ ਗਾਵਾਂ/ਮੱਝਾਂ ਪਾਲਣ, ਮੁਰਗੀ ਪਾਲਣ ਅਤੇ ਮੁੱਲ ਵਾਧਾ ਸ਼੍ਰੇਣੀਆਂ ਵਿੱਚ ਵੱਕਾਰੀ “ਮੁੱਖ ਮੰਤਰੀ ਪੁਰਸਕਾਰ” ਨਾਲ ਸਨਮਾਨਿਤ ਕੀਤਾ ਜਾਵੇਗਾ।