FCI Anna Darpan ਪੋਰਟਲ ‘ਚ ਤਕਨੀਕੀ ਖ਼ਾਮੀਆਂ: ਪੰਜਾਬ ਦੇ ਚੌਲ ਮਿੱਲਰਾਂ ਦੀਆਂ ਵਧੀਆਂ ਮੁਸ਼ਕਲਾਂ

ਪੰਜਾਬ ਦੇ ਚੌਲ ਮਿੱਲਰਾਂ ਨੇ ਭਾਰਤੀ ਖ਼ੁਰਾਕ ਨਿਗਮ (FCI) ਦੇ ਨਵੇਂ ਲਾਗੂ ਕੀਤੇ ਗਏ ‘ਅੰਨ ਦਰਪਣ’ (Anna Darpan) ਪੋਰਟਲ ਵਿੱਚ ਆ ਰਹੀਆਂ ਲਗਾਤਾਰ ਤਕਨੀਕੀ ਅਤੇ ਸੰਚਾਲਨ ਸੰਬੰਧੀ ਸਮੱਸਿਆਵਾਂ ਬਾਰੇ ਚਿੰਤਾ ਪ੍ਰਗਟਾਈ ਹੈ। ਕਸਟਮ ਮਿਲਡ ਰਾਈਸ (CMR) ਦੀ ਸਪਲਾਈ ਦੌਰਾਨ ਆ ਰਹੀਆਂ ਇਨ੍ਹਾਂ ਖ਼ਰਾਬੀਆਂ ਕਾਰਨ ਬੁਕਿੰਗ, ਸਟੈਕ ਅਲਾਟਮੈਂਟ ਅਤੇ ਚੌਲਾਂ ਦੀ ਸਮੇਂ ਸਿਰ ਡਿਲੀਵਰੀ ਦਾ ਕੰਮ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਿਹਾ ਹੈ। ਜ਼ਿਕਰਯੋਗ, ਖ਼ਰੀਫ ਮੰਡੀਕਰਨ ਸੀਜ਼ਨ (KMS) 2026-27 ਲਈ ਝੋਨੇ ਦੀ ਅਗਲੀ ਅਲਾਟਮੈਂਟ ਹਾਸਲ ਕਰਨ ਲਈ 85 ਫ਼ੀਸਦੀ ਚੌਲ ਜਮ੍ਹਾਂ ਕਰਵਾਉਣ ਦਾ ਟੀਚਾ ਪੂਰਾ ਕਰਨਾ ਲਾਜ਼ਮੀ ਹੈ। ਅਜਿਹੇ ਸਥਿਤੀ ਵਿੱਚ, ਪੋਰਟਲ ਦੇ ਹੌਲੀ ਚੱਲਣ ਕਾਰਨ ਮਿੱਲ ਮਾਲਕਾਂ ਦੀ ਚਿੰਤਾ ਬਹੁਤ ਵਧ ਗਈ ਹੈ।

ਖ਼ਾਲੀ ਸਟੈਕਾਂ ਦੇ ਅੰਕੜਿਆਂ ਦੀ ਘਾਟ

ਮਿੱਲਰਾਂ ਦੇ ਮੁਤਾਬਕ, ਸਭ ਤੋਂ ਵੱਡੀ ਸਮੱਸਿਆ ਡਿਪੂਆਂ ਵਿੱਚ ਖ਼ਾਲੀ ਸਟੈਕਾਂ ਦੀ ਜਾਣਕਾਰੀ ਦਾ ਸਮੇਂ ਸਿਰ ਅੱਪਡੇਟ ਨਾ ਹੋਣਾ ਹੈ। FCI ਡਿਪੂਆਂ ਦਾ ਸਟਾਫ਼ ਖ਼ੁਦ Anna Darpan ਪੋਰਟਲ ‘ਤੇ ਖ਼ਾਲੀ ਸਟੈਕਾਂ ਦਾ ਵੇਰਵਾ ਦਰਜ ਕਰਨ ਵਿੱਚ ਦਿੱਕਤਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਇਸ ਕਾਰਨ ਜ਼ਮੀਨੀ ਪੱਧਰ ‘ਤੇ ਮੌਜੂਦ ਜਗ੍ਹਾ ਅਤੇ ਆਨਲਾਈਨ ਪ੍ਰਦਰਸ਼ਿਤ ਅੰਕੜਿਆਂ ਵਿੱਚ ਭਾਰੀ ਅੰਤਰ ਸਾਹਮਣੇ ਆ ਰਿਹਾ ਹੈ। ਸਹੀ ਜਾਣਕਾਰੀ ਦੀ ਘਾਟ ਕਾਰਨ, ਮਿੱਲਰਾਂ ਲਈ ਨਿਰਧਾਰਤ ਸਮਾਂ ਸੀਮਾ ਦੇ ਅੰਦਰ ਵਾਹਨਾਂ ਦਾ ਪ੍ਰਬੰਧ ਕਰਨਾ, ਡਿਲੀਵਰੀ ਦੀ ਯੋਜਨਾ ਬਣਾਉਣਾ ਅਤੇ ਔਨਲਾਈਨ ਬੁਕਿੰਗ ਪੂਰੀ ਕਰਨਾ ਬਹੁਤ ਮੁਸ਼ਕਲ ਹੋ ਗਿਆ ਹੈ।

ਸਟੈਕ ਅਲਾਟਮੈਂਟ ‘ਚ ਦੇਰੀ

ਕਈ ਮਾਮਲਿਆਂ ਵਿੱਚ, ਮਿੱਲਰਾਂ ਵੱਲੋਂ ਆਨਲਾਈਨ ਬੁਕਿੰਗ ਦੀ ਪ੍ਰਕਿਰਿਆ ਸਫ਼ਲਤਾਪੂਰਵਕ ਪੂਰੀ ਕਰਨ ਦੇ ਬਾਵਜੂਦ ਵੀ ਸਟੈਕ ਅਲਾਟਮੈਂਟ ਜਾਰੀ ਨਹੀਂ ਕੀਤੀ ਜਾਂਦੀ। ਇਸ ਤੋਂ ਇਲਾਵਾ, ਜੇਕਰ ਕਦੇ ਸਟੈਕ ਅਲਾਟ ਕਰ ਵੀ ਦਿੱਤਾ ਜਾਂਦਾ ਹੈ, ਤਾਂ ਵੀ ਇਸ ਸਬੰਧੀ ਸੂਚਨਾ ਮਿੱਲਰਾਂ ਤੱਕ ਸਮੇਂ ਸਿਰ ਨਹੀਂ ਪਹੁੰਚਦੀ। ਨਤੀਜੇ ਵਜੋਂ, ਸਾਰੀ ਕਾਗ਼ਜ਼ੀ ਅਤੇ ਡਿਜੀਟਲ ਪ੍ਰਕਿਰਿਆ ਮੁਕੰਮਲ ਕਰਨ ਦੇ ਬਾਵਜੂਦ ਵੀ ਮਿੱਲਰ ਚੌਲਾਂ ਦੀ ਫ਼ਿਜ਼ੀਕਲ ਡਿਲੀਵਰੀ ਕਰਨ ਤੋਂ ਅਸਮਰੱਥ ਰਹਿੰਦੇ ਹਨ। 

ਡਿਪੂ-ਵਾਰ ਜਾਣਕਾਰੀ ਦੀ ਮੰਗ

ਮਿੱਲ ਮਾਲਕਾਂ ਨੇ ਮੰਗ ਕੀਤੀ ਹੈ ਕਿ Ann Darpan ਪੋਰਟਲ ‘ਤੇ ਸਿਰਫ਼ ਜ਼ਿਲ੍ਹਾ-ਵਾਰ ਜਾਣਕਾਰੀ ਦੀ ਬਜਾਏ ਡਿਪੂ-ਵਾਰ ਅਤੇ ਰੇਲ-ਹੈੱਡ ਅਨੁਸਾਰ ਡਾਟਾ ਦਿਖਾਇਆ ਜਾਵੇ। ਖ਼ਾਸ ਥਾਵਾਂ ‘ਤੇ ਖ਼ਾਲੀ ਸਟੈਕਾਂ ਦੀ ਰੀਅਲ-ਟਾਈਮ ਜਾਣਕਾਰੀ ਮਿਲਣਾ ਲੌਜਿਸਟਿਕਸ ਅਤੇ ਟਰਾਂਸਪੋਰਟੇਸ਼ਨ ਦੀ ਯੋਜਨਾਬੰਦੀ ਲਈ ਬਹੁਤ ਜ਼ਰੂਰੀ ਹੈ। ਮਿੱਲਰਾਂ ਨੇ FCI ਡਿਪੂਆਂ/ਰੇਲ ਹੈੱਡਾਂ ‘ਤੇ ਖ਼ਾਲੀ ਸਟੈਕਾਂ ਦੀ ਅਸਲ ਉਪਲਬਧਤਾ ਅਤੇ ਪੋਰਟਲ ਵਿਚਕਾਰ ਰੀਅਲ-ਟਾਈਮ ਤਾਲਮੇਲ ਦੀ ਮੰਗ ਕੀਤੀ ਹੈ, ਕਿਉਂਕਿ ਜ਼ਮੀਨੀ ਹਕੀਕਤ ਅਤੇ ਆਨਲਾਈਨ ਡਾਟਾ ਵਿਚਕਾਰ ਕੋਈ ਵੀ ਅੰਤਰ ਸਿੱਧੇ ਤੌਰ ‘ਤੇ ਉਨ੍ਹਾਂ ਦੀ ਯੋਜਨਾਬੰਦੀ ਅਤੇ ਸਮੇਂ ਸਿਰ CMR ਦੀ ਸਪਲਾਈ ਨੂੰ ਪ੍ਰਭਾਵਿਤ ਕਰਦਾ ਹੈ। 

ਮਜ਼ਬੂਤ ਤਕਨੀਕੀ ਸਹਾਇਤਾ ਦੀ ਲੋੜ

ਪੰਜਾਬ ਭਰ ਦੇ 5,000 ਤੋਂ ਵੱਧ ਚੌਲ ਮਿੱਲਰ ਆਪਣੀ ਰੋਜ਼ਾਨਾ ਡਿਲੀਵਰੀ ਲਈ Anna Darpan ‘ਤੇ ਨਿਰਭਰ ਹਨ। ਮਿੱਲਰਾਂ ਨੇ ਮੰਗ ਕੀਤੀ ਹੈ ਕਿ FCI ਪੱਧਰ ‘ਤੇ ਇੱਕ ਸਮਰਪਿਤ ਤਕਨੀਕੀ ਸਹਾਇਤਾ ਅਤੇ ਹੈਲਪਡੈਸਕ ਸਥਾਪਿਤ ਕੀਤਾ ਜਾਵੇ। ਇਸ ਤੋਂ ਇਲਾਵਾ, ਉਨ੍ਹਾਂ ਨੂੰ ਟਿਕਟ ਮੈਨੇਜਮੈਂਟ ਸਿਸਟਮ (TMS) ਤੱਕ ਸਿੱਧੀ ਪਹੁੰਚ ਦਿੱਤੀ ਜਾਵੇ ਤਾਂ ਜੋ ਉਹ ਆਪਣੀਆਂ ਸਮੱਸਿਆਵਾਂ ਦਰਜ ਕਰਵਾ ਕੇ ਟਰੈਕ ਕਰ ਸਕਣ। ਇੱਕ ਸਮਾਂ-ਬੱਧ ਸ਼ਿਕਾਇਤ ਨਿਵਾਰਨ ਪ੍ਰਣਾਲੀ ਬਣਾਈ ਜਾਣੀ ਚਾਹੀਦੀ ਹੈ ਤਾਂ ਜੋ ਮਿੱਲ ਮਾਲਕਾਂ ਨੂੰ ਛੋਟੀਆਂ-ਛੋਟੀਆਂ ਤਕਨੀਕੀ ਖ਼ਾਮੀਆਂ ਲਈ ਸਰਕਾਰੀ ਦਫ਼ਤਰਾਂ ਦੇ ਵਾਰ-ਵਾਰ ਚੱਕਰ ਨਾ ਲਗਾਉਣੇ ਪੈਣ।

ਇਸ ਦੇ ਨਾਲ ਹੀ, ਮਿੱਲਰਾਂ ਨੇ FCI, ਪੰਜਾਬ ਸਰਕਾਰ ਅਤੇ ਖ਼ਰੀਦ ਏਜੰਸੀਆਂ ਵਿਚਕਾਰ ਆਪਸੀ ਤਾਲਮੇਲ ਮਜ਼ਬੂਤ ਕਰਨ ਦੀ ਅਪੀਲ ਕੀਤੀ ਹੈ ਤਾਂ ਜੋ ਮੌਜੂਦਾ ਖ਼ਰੀਦ ਸੀਜ਼ਨ ਬਿਨਾਂ ਕਿਸੇ ਰੁਕਾਵਟ ਦੇ ਸਫ਼ਲਤਾਪੂਰਵਕ ਨੇਪਰੇ ਚੜ੍ਹ ਸਕੇ।