ਐਮ.ਏ.-ਬੀ.ਐੱਡ. ਡਿਗਰੀ ਵਾਲੀ ਅਧਿਆਪਕਾ ਬਣੀ ਸਫ਼ਲ ਡੇਅਰੀ ਕਿਸਾਨ: ਤਕਨਾਲੋਜੀ ਨਾਲ ਵਧਾਇਆ ਮੁਨਾਫ਼ਾ

ਪੰਜਾਬ ਦੇ ਰੂਪਨਗਰ ਜ਼ਿਲ੍ਹੇ ਦੇ ਵਸਨੀਕ ਗੁਰਵਿੰਦਰ ਸਿੰਘ ਦੀ ਕਹਾਣੀ ਉਨ੍ਹਾਂ ਸਾਰੀਆਂ ਔਰਤਾਂ ਅਤੇ ਨੌਜਵਾਨਾਂ ਲਈ ਪ੍ਰੇਰਨਾ ਹੈ ਜੋ ਰਵਾਇਤੀ ਨੌਕਰੀਆਂ ਤੋਂ ਬਾਹਰ ਆਪਣਾ ਕਾਰੋਬਾਰ ਸਥਾਪਤ ਕਰਨ ਦਾ ਸੁਪਨਾ ਦੇਖਦੀਆਂ ਹਨ। ਗੁਰਵਿੰਦਰ ਸਿੰਘ, ਜਿਸਨੇ ਉੱਚ ਸਿੱਖਿਆ (ਐਮ.ਏ. ਅਤੇ ਬੀ.ਐੱਡ.) ਪੂਰੀ ਕੀਤੀ ਹੈ, 2014 ਤੱਕ ਇੱਕ ਨਿੱਜੀ ਸਕੂਲ ਵਿੱਚ ਬਤੌਰ ਅਧਿਆਪਕਾ ਵਜੋਂ ਕੰਮ ਕਰ ਰਹੀ ਸੀ। ਪਰ ਉਸਦੇ ਮਨ ਵਿੱਚ ਹਮੇਸ਼ਾ ‘ਆਪਣਾ ਕੁਝ’ ਕਰਨ ਦੀ ਇੱਛਾ ਰਹਿੰਦੀ ਸੀ। ਇਸ ਅੰਦਰੂਨੀ ਪ੍ਰੇਰਣਾ ਨੇ ਉਸਨੂੰ ਅਧਿਆਪਕ ਦੀ ਸੁਰੱਖਿਅਤ ਨੌਕਰੀ ਛੱਡ ਕੇ ਖੇਤੀਬਾੜੀ ਅਤੇ ਪਸ਼ੂ ਪਾਲਣ ਦੇ ਖੇਤਰ ‘ਚ ਪ੍ਰਵੇਸ਼ ਕਰਨ ਲਈ ਪ੍ਰੇਰਿਤ ਕੀਤਾ।

ਜ਼ਮੀਨੀ ਪੱਧਰ ‘ਤੇ ਖੇਤੀ ਅਤੇ ਸ਼ੁਰੂਆਤੀ ਪਸ਼ੂ ਪਾਲਣ

ਸ਼ੁਰੂਆਤ ‘ਚ, ਗੁਰਵਿੰਦਰ ਸਿੰਘ ਨੇ ਆਪਣੀ ਤਿੰਨ ਏਕੜ ਜ਼ਮੀਨ ‘ਤੇ ਖੇਤੀ ਦੇ ਕਾਰਜਾਂ ਨੂੰ ਸੰਭਾਲਿਆ। ਉਹ ਕਣਕ, ਮੱਕੀ, ਚੌਲ ਅਤੇ ਮੂੰਗੀ ਵਰਗੀਆਂ ਫ਼ਸਲਾਂ ਦੀ ਕਾਸ਼ਤ ਕਰਦੀ ਹੈ। ਜ਼ਿਕਰਯੋਗ ਖੇਤੀ ਦੇ ਨਾਲ-ਨਾਲ, ਉਸ ਨੇ ਤਿੰਨ ਸਾਹੀਵਾਲ ਗਾਵਾਂ ਵੀ ਪਾਲੀਆਂ ਹੋਈਆਂ ਹਨ। ਉਹ ਆਪਣੀ ਖੇਤੀ ਉਪਜ ਅਤੇ ਡੇਅਰੀ ਉਤਪਾਦ ਸਿੱਧੇ ਗਾਹਕਾਂ ਨੂੰ ਵੇਚਦੀ ਹੈ, ਜਿਸ ਨਾਲ ਉਸਨੂੰ ਵਧੇਰੇ ਮੁਨਾਫ਼ਾ ਮਿਲਦਾ ਹੈ।

ਵਿਗਿਆਨਕ ਸਿਖਲਾਈ ਅਤੇ ਡੇਅਰੀ ਯੂਨਿਟ ਦੀ ਸਥਾਪਨਾ

ਡੇਅਰੀ ਫਾਰਮਿੰਗ ਵਿੱਚ ਆਪਣਾ ਹੱਥ ਅਜ਼ਮਾਉਣ ਦਾ ਫੈਸਲਾ ਕਰਨ ਤੋਂ ਪਹਿਲਾਂ, ਗੁਰਵਿੰਦਰ ਸਿੰਘ ਨੇ ਡੇਅਰੀ ਵਿਕਾਸ ਵਿਭਾਗ ਦੁਆਰਾ ਕਰਵਾਏ ਗਏ ਇੱਕ ਸਿਖਲਾਈ ਪ੍ਰੋਗਰਾਮ ਵਿੱਚ ਹਿੱਸਾ ਲਿਆ। ਇਸ ਸਿਖਲਾਈ ਦੌਰਾਨ, ਉਸਨੇ ਡੇਅਰੀ ਪਸ਼ੂਆਂ ਦੀ ਚੋਣ, ਰਿਹਾਇਸ਼, ਚਾਰਾ ਪ੍ਰਬੰਧਨ, ਨਸਲ ਸੁਧਾਰ ਅਤੇ ਡੇਅਰੀ ਫਾਰਮਿੰਗ ਦੇ ਵਿਗਿਆਨਕ ਤਰੀਕਿਆਂ ਬਾਰੇ ਵਿਸਥਾਰ ਵਿੱਚ ਸਿੱਖਿਆ। ਵਿਗਿਆਨਕ ਪ੍ਰਬੰਧਨ ਵਿੱਚ ਸਹੀ ਗਿਆਨ ਅਤੇ ਸਿੱਖਿਆ ਪ੍ਰਾਪਤ ਕਰਨ ਤੋਂ ਬਾਅਦ, ਉਸਨੇ ਪਸ਼ੂ ਪਾਲਣ ਦੇ ਖੇਤਰ ਵਿੱਚ ਪ੍ਰਵੇਸ਼ ਕਰਨ ਦਾ ਫੈਸਲਾ ਕੀਤਾ ਅਤੇ ਸਿਰਫ਼ ਇੱਕ ਹੌਲਸਟੀਨ ਫਰੀਜ਼ੀਅਨ (Holstein Friesian) ਗਾਂ ਨਾਲ ਇੱਕ ਡੇਅਰੀ ਯੂਨਿਟ ਦੀ ਸ਼ੁਰੂਆਤ ਕੀਤੀ।

ਤਕਨਾਲੋਜੀ ਰਾਹੀਂ ਕਾਰੋਬਾਰ ਦਾ ਵਿਸਥਾਰ

ਇਸ ਦੇ ਨਾਲ ਹੀ ਜਿਵੇਂ-ਜਿਵੇਂ ਉਸਨੇ ਸਿਖਲਾਈ ‘ਚ ਸਿੱਖੀਆਂ ਵਿਗਿਆਨਕ ਵਿਧੀਆਂ ਨੂੰ ਅਪਣਾਇਆ, ਉਸਦਾ ਦੁੱਧ ਉਤਪਾਦਨ ਵਧਿਆ ਹੁੰਦਾ ਗਿਆ, ਜਿਸ ਨਾਲ ਉਸਦਾ ਆਤਮਵਿਸ਼ਵਾਸ ਵਧਿਆ। ਇਸ ਸਫਲਤਾ ਨੇ ਉਸਨੂੰ ਆਪਣੇ ਕਾਰੋਬਾਰ ਨੂੰ ਵੱਡੇ ਪੱਧਰ ‘ਤੇ ਲੈ ਜਾਣ ਲਈ ਪ੍ਰੇਰਿਤ ਕੀਤਾ। ਗੁਰਵਿੰਦਰ ਸਿੰਘ ਨੇ ਆਪਣੇ ਡੇਅਰੀ ਫਾਰਮ ਨੂੰ ਆਧੁਨਿਕ ਬਣਾਉਣ ਲਈ ਤਕਨਾਲੋਜੀ ਦਾ ਫਾਇਦਾ ਉਠਾਇਆ। ਉਸਨੇ ਇੱਕ ਤੂੜੀ ਕੱਟਣ ਵਾਲਾ, ਇੱਕ ਦੁੱਧ ਕੱਢਣ ਵਾਲੀ ਮਸ਼ੀਨ ਅਤੇ ਇੱਕ ਸਾਈਲੇਜ ਯੂਨਿਟ ਖਰੀਦੀ। ਅੱਜ, ਉਸਦੇ ਫਾਰਮ ਵਿੱਚ 4 ਹੋਰ ਹੌਲਸਟੀਨ ਫਰੀਜ਼ੀਅਨ ਦੁਧਾਰੂ ਗਾਵਾਂ ਹਨ। ਜ਼ਿਕਰਯੋਗ ਹੈ ਕਿ ਰੋਜ਼ਾਨਾ ਲਗਭਗ 90 ਲੀਟਰ ਦੁੱਧ ਪੈਦਾ ਕੀਤਾ ਜਾ ਰਿਹਾ ਹੈ, ਜਿਸਨੂੰ ਉਹ ਸਥਾਨਕ ਲੋਕਾਂ ਨੂੰ ਵੇਚਦੀ ਹੈ, ਜਿਸ ਵਿੱਚ ਵਰਕਾ ਡੇਅਰੀ ਵੀ ਸ਼ਾਮਲ ਹੈ।

ਸਿਖਲਾਈ ਅਤੇ ਤਕਨਾਲੋਜੀ ਦੀ ਸ਼ਕਤੀ

ਗੁਰਵਿੰਦਰ ਨੇ ਸਫਲਤਾਪੂਰਵਕ ਇਹ ਸਾਬਤ ਕਰ ਦਿੱਤਾ ਹੈ ਕਿ ਡੇਅਰੀ ਦਾ ਕਾਰੋਬਾਰ ਛੋਟੇ ਪੱਧਰ ਤੋਂ ਸ਼ੁਰੂ ਕੀਤਾ ਜਾ ਸਕਦਾ ਹੈ ਅਤੇ ਇਸ ਵਿੱਚ ਵੱਡੀ ਸਫ਼ਲਤਾ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਉਸਦੀ ਪ੍ਰਾਪਤੀ ਸਿਰਫ਼ ਇੱਕ ਕਾਰੋਬਾਰੀ ਸਫ਼ਲਤਾ ਹੀ ਨਹੀਂ, ਸਗੋਂ ਇਹ ਦਰਸਾਉਂਦੀ ਹੈ ਕਿ ਜੇਕਰ ਕਿਸਾਨ ਸਹੀ ਮਾਰਗਦਰਸ਼ਨ ਲੈਣ, ਲੋੜੀਂਦੀ ਸਿਖਲਾਈ ਪ੍ਰਾਪਤ ਕਰਨ ਅਤੇ ਆਧੁਨਿਕ ਤਕਨਾਲੋਜੀ ਦੀ ਵਰਤੋਂ ਕਰਨ ਤਾਂ ਡੇਅਰੀ ਫਾਰਮਿੰਗ ਇੱਕ ਬਹੁਤ ਹੀ ਲਾਭਦਾਇਕ ਅਤੇ ਸਥਿਰ ਕਿੱਤਾ ਬਣ ਸਕਦੀ ਹੈ। 

ਇਸ ਤੋਂ ਇਲਾਵਾ ਗੁਰਵਿੰਦਰ ਸਿੰਘ ਨੇ ਆਪਣੇ ਕੰਮ ਰਾਹੀਂ ਡੇਅਰੀ ਫਾਰਮਿੰਗ ਨੂੰ ਇੱਕ ਸਨਮਾਨਜਨਕ ਕਾਰੋਬਾਰ ਵਜੋਂ ਸਥਾਪਿਤ ਕੀਤਾ ਹੈ। ਉਹ ਨਾ ਸਿਰਫ਼ ਆਪਣੇ ਖੇਤਰ ਦੇ ਹੋਰ ਕਿਸਾਨਾਂ ਲਈ, ਬਲਕਿ ਖਾਸ ਕਰਕੇ ਔਰਤਾਂ ਲਈ ਇੱਕ ਉੱਤਮ ਮਿਸਾਲ ਹੈ, ਜੋ ਘਰੇਲੂ ਕਾਰੋਬਾਰ ਸ਼ੁਰੂ ਕਰਨ ਦੀ ਇੱਛਾ ਰੱਖਦੀਆਂ ਹਨ।