ਰਸਾਇਣਾਂ ਤੋਂ ਮੁਕਤੀ: PAU ਵੱਲੋਂ ਤਿਆਰ “ਗ੍ਰੀਨ ਕਲੀਨਿੰਗ” ਫਾਰਮੂਲੇ ਨਾਲ ਹੁਣ ਘਰ ਹੋਣਗੇ ਸੁਰੱਖਿਅਤ

ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ (PAU), ਲੁਧਿਆਣਾ ਨੇ ਘਰੇਲੂ ਵਰਤੋਂ ਲਈ ਬਾਇਓ-ਐਨਜ਼ਾਈਮ ਅਧਾਰਤ ਉਤਪਾਦਾਂ ਦੀ ਇੱਕ ਨਵੀਂ ਸ਼੍ਰੇਣੀ ਪੇਸ਼ ਕੀਤੀ ਹੈ। ਇਹ ਉਤਪਾਦ ਰਸਾਇਣਕ ਕਲੀਨਰਾਂ ਦੇ ਸਿਹਤ ‘ਤੇ ਪੈਣ ਵਾਲੇ ਮਾੜੇ ਪ੍ਰਭਾਵਾਂ ਨੂੰ ਘਟਾਉਣ ਅਤੇ ਵਾਤਾਵਰਣ ਦੀ ਸੰਭਾਲ ਲਈ ਇੱਕ ਵੱਡੀ ਉਮੀਦ ਵਜੋਂ ਦੇਖੇ ਜਾ ਰਹੇ ਹਨ। ਜ਼ਿਕਰਯੋਗ, ਕਰੋਨਾ ਕਾਲ ਤੋਂ ਬਾਅਦ ਜਿਸ ਤਰ੍ਹਾਂ ਰਸਾਇਣਕ ਡਿਸਇਨਫੈਕਟੈਂਟਸ ਦੀ ਵਰਤੋਂ ਵਧੀ ਹੈ, ਉਸ ਨੇ ਸਾਡੇ ਸਾਹ ਪ੍ਰਣਾਲੀ ਅਤੇ ਚਮੜੀ ਲਈ ਨਵੇਂ ਖਤਰੇ ਪੈਦਾ ਕੀਤੇ ਹਨ। ਇਸ ਦੇ ਹੱਲ ਵਜੋਂ PAU ਨੇ ਹੈਂਡਵਾਸ਼, ਡਿਸ਼ਵਾਸ਼ ਅਤੇ ਲਿਕਵਿਡ ਡਿਟਰਜੈਂਟ ਵਰਗੇ ਜੈਵਿਕ ਵਿਕਲਪ ਤਿਆਰ ਕੀਤੇ ਹਨ।

ਕਿੰਨੂ ਦੇ ਛਿਲਕਿਆਂ ਤੋਂ ਸਫਾਈ ਦਾ ਜਾਦੂ

ਇਸ ਪੂਰੀ ਮੁਹਿੰਮ ਦੇ ਕੇਂਦਰ ਵਿੱਚ ‘PAU EcoSol’ ਨਾਮਕ ਸਿਟਰਸ ਬਾਇਓ-ਐਨਜ਼ਾਈਮ ਹੈ। ਇਹ ਕਿੰਨੂ ਦੇ ਛਿਲਕਿਆਂ ਅਤੇ ਹੋਰ ਜੈਵਿਕ ਰਹਿੰਦ-ਖੂੰਹਦ ਨੂੰ ਫਰਮੈਂਟ ਕਰਕੇ ਤਿਆਰ ਕੀਤਾ ਗਿਆ ਹੈ। ਇਸ ਵਿੱਚ ਕੁਦਰਤੀ ਐਨਜ਼ਾਈਮ ਅਤੇ ਆਰਗੈਨਿਕ ਐਸਿਡ ਹੁੰਦੇ ਹਨ ਜੋ ਗੰਦਗੀ ਨੂੰ ਸਾਫ਼ ਕਰਨ, ਚਿਕਨਾਈ ਹਟਾਉਣ ਅਤੇ ਇੱਥੋਂ ਤੱਕ ਕਿ ਨਾਲੀਆਂ ਦੀ ਸਫਾਈ ਕਰਨ ਵਿੱਚ ਵੀ ਬੇਹੱਦ ਪ੍ਰਭਾਵਸ਼ਾਲੀ ਹਨ।

PAU ਦੇ ਮਾਈਕਰੋਬਾਇਓਲੋਜੀ ਵਿਭਾਗ ਨੇ ਇਨ੍ਹਾਂ ਉਤਪਾਦਾਂ ਵਿੱਚ ਰੀਠਾ, ਕੋਕੋਗਲੂਕੋਸਾਈਡ ਅਤੇ ਜ਼ੈਂਥਨ ਗਮ ਵਰਗੇ ਕੁਦਰਤੀ ਤੱਤਾਂ ਦੀ ਵਰਤੋਂ ਕੀਤੀ ਹੈ, ਤਾਂ ਜੋ ਇਨ੍ਹਾਂ ਵਿੱਚ ਵਪਾਰਕ ਉਤਪਾਦਾਂ ਵਾਂਗ ਚੰਗੀ ਝੱਗ ਅਤੇ ਗਾੜ੍ਹਾਪਣ ਦੇ ਗੁਣ ਮਿਲ ਸਕੇ। ਇਹ ਵਿਗਿਆਨਕ ਤੌਰ ‘ਤੇ ਪ੍ਰਮਾਣਿਤ ਫਾਰਮੂਲੇ ਹਾਨੀਕਾਰਕ ਰਸਾਇਣਕ ਲੋਡ ਨੂੰ ਘਟਾ ਕੇ ਹਰ ਘਰ ਲਈ ਇੱਕ ਸਿਹਤਮੰਦ ਅਤੇ ਸੁਰੱਖਿਅਤ ਵਾਤਾਵਰਣ ਬਣਾਉਣ ਵਿੱਚ ਮਦਦ ਕਰਦੇ ਹਨ।

ਸਿਹਤ ਅਤੇ ਵਾਤਾਵਰਣ ਲਈ ਵਰਦਾਨ

ਆਮ ਤੌਰ ‘ਤੇ ਵਰਤੇ ਜਾਣ ਵਾਲੇ ਕਲੀਨਰਾਂ ਵਿੱਚ ‘ਕੁਆਟਰਨਰੀ ਅਮੋਨੀਅਮ’ ਅਤੇ ਨਕਲੀ ਖੁਸ਼ਬੂਆਂ ਹੁੰਦੀਆਂ ਹਨ ਜੋ ਸਾਹ ਦੀਆਂ ਬਿਮਾਰੀਆਂ ਅਤੇ ਸਰੀਰਕ ਸੋਜਸ਼ ਵਰਗੀਆਂ ਸਮੱਸਿਆਵਾਂ ਪੈਦਾ ਕਰ ਸਕਦੀਆਂ ਹਨ। PAU ਦੇ ਵਾਈਸ-ਚਾਂਸਲਰ ਡਾ. ਸਤਬੀਰ ਸਿੰਘ ਗੋਸਲ ਦੇ ਅਨੁਸਾਰ, ਇਹ ਤਕਨੀਕ ਨਾ ਸਿਰਫ਼ ਵਾਤਾਵਰਣ ਨੂੰ ਬਚਾਉਂਦੀ ਹੈ ਬਲਕਿ ਪੇਂਡੂ ਉਦਮੀਕਰਨ ਲਈ ਵੀ ਨਵੇਂ ਰਾਹ ਖੋਲ੍ਹਦੀ ਹੈ। ਸਿਟਰਸ ਰਹਿੰਦ-ਖੂੰਹਦ ਨੂੰ ਕੀਮਤੀ ਉਤਪਾਦਾਂ ਵਿੱਚ ਬਦਲਣਾ “ਕੂੜੇ ਤੋਂ ਖ਼ਜ਼ਾਨਾ” ਬਣਾਉਣ ਦੀ ਇੱਕ ਉੱਤਮ ਮਿਸਾਲ ਹੈ, ਜੋ ਕਿ ਟਿਕਾਊ ਖੇਤੀਬਾੜੀ ਅਤੇ ਸਥਾਨਕ ਰੁਜ਼ਗਾਰ ਦੇ ਮੌਕਿਆਂ ਨੂੰ ਵੀ ਮਜ਼ਬੂਤ ਕਰਦੀ ਹੈ।

ਵਰਤੋਂ ਵਿੱਚ ਸੌਖ ਅਤੇ ਕਿਫਾਇਤੀ ਕੀਮਤ

ਮੁੱਖ ਵਿਗਿਆਨੀ ਡਾ. ਉਰਮਿਲਾ ਗੁਪਤਾ ਨੇ ਦੱਸਿਆ ਕਿ ਇਹ ਉਤਪਾਦ ਆਮ ਲੋਕਾਂ ਦੀਆਂ ਰੋਜ਼ਾਨਾ ਲੋੜਾਂ ਅਤੇ ਸਹੂਲਤ ਨੂੰ ਧਿਆਨ ਵਿੱਚ ਰੱਖ ਕੇ ਤਿਆਰ ਕੀਤੇ ਗਏ ਹਨ। ਇਹ ਵਰਤਣ ਲਈ ਬਹੁਤ ਹੀ ਕਿਫਾਇਤੀ ਹਨ, ਉਦਾਹਰਨ ਵਜੋਂ, 10 ਲੀਟਰ ਪਾਣੀ ਵਿੱਚ ਕੱਪੜੇ ਸਾਫ਼ ਕਰਨ ਲਈ ਸਿਰਫ਼ 20 ਮਿਲੀਲੀਟਰ ਡਿਟਰਜੈਂਟ ਕਾਫ਼ੀ ਹੈ। ਇਸੇ ਤਰ੍ਹਾਂ, ਡਿਸ਼ਵਾਸ਼ ਦੀ ਥੋੜ੍ਹੀ ਜਿਹੀ ਮਾਤਰਾ ਭਾਂਡਿਆਂ ਦੀ ਸਖ਼ਤ ਤੋਂ ਸਖ਼ਤ ਚਿਕਨਾਈ ਨੂੰ ਆਸਾਨੀ ਨਾਲ ਖ਼ਤਮ ਕਰ ਦਿੰਦੀ ਹੈ।

ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਇਹ ਫਾਰਮੂਲੇ ਚਮੜੀ, ਮਹਿੰਗੇ ਕੱਪੜਿਆਂ ਅਤੇ ਰਸੋਈ ਦੇ ਭਾਂਡਿਆਂ ਲਈ ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ ਕਿਉਂਕਿ ਇਹ ਰਸਾਇਣ-ਮੁਕਤ ਹਨ। ਜ਼ਿਕਰਯੋਗ ਇਨ੍ਹਾਂ ਉਤਪਾਦਾਂ ਨੂੰ ਆਮ ਲੋਕਾਂ ਤੱਕ ਪਹੁੰਚਯੋਗ ਬਣਾਉਣ ਲਈ, ਇਹ ਉਤਪਾਦ PAU ਦੇ ਮਾਈਕ੍ਰੋਬਾਇਓਲੋਜੀ ਵਿਭਾਗ ਵਿਖੇ ਵੱਖ-ਵੱਖ ਪੈਕਿੰਗ ਸਾਈਜ਼ਾਂ ਅਤੇ ਵਾਜਬ ਕੀਮਤਾਂ ‘ਤੇ ਉਪਲਬਧ ਕਰਵਾਏ ਗਏ ਹਨ।

ਗਾਹਕ ਆਪਣੀ ਲੋੜ ਅਨੁਸਾਰ 200 ਮਿਲੀਲੀਟਰ ਦੀ ਬੋਤਲ 60 ਰੁਪਏ ਵਿੱਚ, 500 ਮਿਲੀਲੀਟਰ ਦੀ ਬੋਤਲ 130 ਰੁਪਏ ਵਿੱਚ ਅਤੇ 1 ਲੀਟਰ ਦਾ ਪੈਕ 250 ਰੁਪਏ ‘ਚ ਖਰੀਦ ਸਕਦੇ ਹਨ। ਇਸ ਤੋਂ ਇਲਾਵਾ, ਇਹ ਉਤਪਾਦ ਨਾ ਸਿਰਫ਼ ਘਰਾਂ ਵਿੱਚ ਸਫ਼ਾਈ ਨੂੰ ਯਕੀਨੀ ਬਣਾਉਂਦੇ ਹਨ, ਸਗੋਂ ਆਪਣੇ ਵਾਤਾਵਰਣ ਅਨੁਕੂਲਤਾ ਦੇ ਕਾਰਨ ਪ੍ਰਦੂਸ਼ਣ ਨੂੰ ਘਟਾਉਣ ਵਿੱਚ ਵੀ ਮਹੱਤਵਪੂਰਨ ਯੋਗਦਾਨ ਪਾਉਂਦੇ ਹਨ।