GADVASU ਵੱਲੋਂ ਬੇਰੁਜ਼ਗਾਰਾਂ ਤੇ ਕਿਸਾਨਾਂ ਲਈ ਖੁਰ ਨਾਪਣ ਦੀ ਵਿਸ਼ੇਸ਼ ਸਿਖਲਾਈ

ਗੁਰੂ ਅੰਗਦ ਦੇਵ ਵੈਟਰਨਰੀ ਐਂਡ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ (GADVASU) ਦਾ ਟੀਚਿੰਗ ਵੈਟਰਨਰੀ ਹਸਪਤਾਲ, ਜੋ ਕਿ ਪੰਜਾਬ ਅਤੇ ਆਸ-ਪਾਸ ਦੇ ਸੂਬਿਆਂ ਦੇ ਪਸ਼ੂ ਪਾਲਕਾਂ ਲਈ ਇੱਕ ਪ੍ਰਮੁੱਖ ਸੰਸਥਾ ਹੈ, ਵੱਲੋਂ 19 ਤੋਂ 21 ਨਵੰਬਰ, 2025 ਦੌਰਾਨ ਇੱਕ ਵਿਸ਼ੇਸ਼ ਤਿੰਨ ਰੋਜ਼ਾ ਸਿਖਲਾਈ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਜ਼ਿਕਰਯੋਗ, ਇਹ ਸਿਖਲਾਈ ਖਾਸ ਤੌਰ ‘ਤੇ ਬੇਰੁਜ਼ਗਾਰ ਨੌਜਵਾਨਾਂ (ਜਿਨ੍ਹਾਂ ਨੇ 10+2 ਪਾਸ ਕੀਤੀ ਹੈ) ਅਤੇ ਅਗਾਂਹਵਧੂ ਡੇਅਰੀ ਕਿਸਾਨਾਂ ਨੂੰ ਉਦੇਸ਼ਿਤ ਹੈ, ਜਿਸਦਾ ਮੁੱਖ ਮੰਤਵ ਡੇਅਰੀ ਪਸ਼ੂਆਂ ਵਿੱਚ ਖੁਰ ਨਾਪਣ (Hoof Trimming) ਦੀ ਪ੍ਰੈਕਟੀਕਲ ਸਿਖਲਾਈ ਦੇਣਾ ਹੈ।

ਸਿਖਲਾਈ ਦਾ ਮਹੱਤਵ ਅਤੇ ਉਦੇਸ਼ 

ਵੈਟਰਨਰੀ ਹਸਪਤਾਲ ਦੀ ਲਾਰਜ ਐਨੀਮਲ ਪ੍ਰਾਇਮਰੀ ਯੂਨਿਟ ਵਿੱਚ ਪਸ਼ੂਆਂ ਵਿੱਚ ਹੋਣ ਵਾਲੀਆਂ ਬਿਮਾਰੀਆਂ ਵਿੱਚੋਂ ਲੰਗੜਾਪਣ (Foot Lameness) ਇੱਕ ਆਮ ਸਮੱਸਿਆ ਹੈ। ਇਹ ਆਰਥਿਕ ਨੁਕਸਾਨ ਕਰਦੀ ਹੈ ਅਤੇ ਦੁੱਧ ਉਤਪਾਦਨ ਘਟਾਉਂਦੀ ਹੈ। ਇਸ ਸਮੱਸਿਆ ਨੂੰ ਰੋਕਣ ਅਤੇ ਇਲਾਜ ਕਰਨ ਲਈ ਖੁਰ ਨਾਪਣ ਇੱਕ ਅਹਿਮ ਕਦਮ ਹੈ। ਇਸ ਵਿੱਚ ਆਧੁਨਿਕ ਚੂਟ ਅਤੇ ਟ੍ਰਿਮਰ ਦੀ ਵਰਤੋਂ ਸਿਖਾਈ ਜਾਵੇਗੀ। ਇਸ ਸਿਖਲਾਈ ਰਾਹੀਂ ਭਾਗੀਦਾਰਾਂ ਨੂੰ ਆਧੁਨਿਕ ਤਕਨੀਕਾਂ ਨਾਲ ਲੈਸ ਕੀਤਾ ਜਾਵੇਗਾ।

ਇਸ ਦੇ ਨਾਲ ਹੀ ਯੂਨਿਟ ‘ਚ ਆਟੋਮੈਟਿਕ ਮਕੈਨਾਈਜ਼ਡ ਐਨੀਮਲ ਚੂਟ ਅਤੇ ਹੈਂਡ ਹੇਲਡ ਆਟੋਮੈਟਿਕ ਹੂਫ ਟ੍ਰਿਮਰ ਵਰਗੇ ਜ਼ਰੂਰੀ ਉਪਕਰਨ ਮੌਜੂਦ ਹਨ। ਇਹ ਆਧੁਨਿਕ ਸਾਧਨ ਖੁਰ ਨਾਪਣ ਦੀ ਪ੍ਰਕਿਰਿਆ ਨੂੰ ਸੁਰੱਖਿਅਤ ਅਤੇ ਤੇਜ਼ ਬਣਾਉਂਦੇ ਹਨ। ਇਸ ਸਿਖਲਾਈ ਤੋਂ ਬਾਅਦ, ਸਿਖਿਆਰਥੀ ਇਸ ਹੁਨਰ ਨੂੰ ਆਪਣਾ ਕੇ ਡੇਅਰੀ ਪਸ਼ੂਆਂ ਦੀ ਸਹੀ ਦੇਖਭਾਲ ਕਰਕੇ ਇੱਕ ਪ੍ਰੋਫੈਸ਼ਨਲ ਹੂਫ ਟ੍ਰਿਮਰ ਵਜੋਂ ਆਪਣਾ ਰੋਜ਼ਗਾਰ ਵੀ ਕਮਾ ਸਕਣਗੇ।

ਸਿਖਲਾਈ ਦਾ ਤਿੰਨ-ਦਿਨ ਦਾ ਪ੍ਰੋਗਰਾਮ 

ਇਹ ਤਿੰਨ ਦਿਨਾਂ ਦਾ ਵਿਸ਼ੇਸ਼ ਸਿਖਲਾਈ ਪ੍ਰੋਗਰਾਮ ਡੇਅਰੀ ਅਤੇ ਪਸ਼ੂ ਪਾਲਣ ਸੈਕਟਰ ਵਿੱਚ ਖੁਰ ਪ੍ਰਬੰਧਨ ਅਤੇ ਲੰਗੜਾਪਣ ਦੀਆਂ ਸਮੱਸਿਆਵਾਂ ਨੂੰ ਸਮਝਣ ਅਤੇ ਹੱਲ ਕਰਨ ਲਈ ਤਿਆਰ ਕੀਤਾ ਗਿਆ ਹੈ। 

ਸਿਖਲਾਈ ਨੂੰ 3 ਭਾਗਾਂ ਵਿੱਚ ਵੰਡਿਆ ਗਿਆ ਹੈ, ਜਿਸ ਵਿੱਚ ਲੈਕਚਰ ਅਤੇ ਪ੍ਰੈਕਟੀਕਲ ਸੈਸ਼ਨ ਸ਼ਾਮਲ ਹਨ:

ਦਿਨ 1: ਖੁਰ ਦੀ ਬਣਤਰ (Foot Anatomy) ਬਾਰੇ ਲੈਕਚਰ, ਲੰਗੜਾਪਣ ਦੇ ਕਾਰਨ (Causes of Lameness) ਅਤੇ ਲੰਗੜਾਪਣ ਦੀ ਪਛਾਣ ਅਤੇ ਖੁਰਾ ਦੀ ਜਾਂਚ (Diagnosis of Lameness) ਦਾ ਅਭਿਆਸ ਕਰਵਾਇਆ ਜਾਵੇਗਾ।

ਦਿਨ 2: ਲੰਗੜੇ ਜਾਨਵਰਾਂ ਦੀ ਤੋਰ ਦੀ ਜਾਂਚ (Lameness Scoring), ਲੰਗੜਾਪਣ ਦੇ ਮਾੜੇ ਪ੍ਰਭਾਵ (Effects of lameness) ਅਤੇ ਖੁਰਾਂ ਦੇ ਜ਼ਖਮਾਂ ਦੀ ਪਛਾਣ (Identification of foot lesions) ਦੀ ਸਿਖਲਾਈ ਦਿੱਤੀ ਜਾਵੇਗੀ।

ਦਿਨ 3: ਲੰਗੜਾਪਣ ਦਾ ਇਲਾਜ (Treatment) ਅਤੇ ਸਭ ਤੋਂ ਮਹੱਤਵਪੂਰਨ ਖੁਰਾ ਦੀ ਮੁਰੰਮਤ (Hoof Trimming) ਦਾ ਹੱਥੀਂ ਅਭਿਆਸ ਕਰਵਾਇਆ ਜਾਵੇਗਾ।

ਯੋਗਤਾ ਅਤੇ ਦਾਖਲਾ ਪ੍ਰਕਿਰਿਆ 

ਯੋਗਤਾ: ਇਹ ਸਿਖਲਾਈ 10+2 ਪਾਸ ਕਰਨ ਵਾਲੇ ਬੇਰੁਜ਼ਗਾਰ ਨੌਜਵਾਨਾਂ ਅਤੇ ਪ੍ਰਗਤੀਸ਼ੀਲ ਡੇਅਰੀ ਕਿਸਾਨਾਂ ਲਈ ਤਿਆਰ ਕੀਤੀ ਗਈ ਹੈ ਤਾਂ ਜੋ ਉਨ੍ਹਾਂ ਨੂੰ ਖੁਰਾਂ ਬਾਰੇ ਸਿਖਲਾਈ ਦਿੱਤੀ ਜਾ ਸਕੇ। 

ਸਿਖਲਾਈ ਫੀਸ: ਪ੍ਰਤੀ ਭਾਗੀਦਾਰ ਨੂੰ Rs. 5000/- ਜਮ੍ਹਾਂ ਕਰਵਾਉਣਾ ਹੋਵੇਗਾ, ਜਿਸ ‘ਤੇ 18% GST ਵਾਧੂ ਲੱਗੇਗਾ (ਕੁੱਲ Rs. 5900/-)। ਇਹ ਫੀਸ 16 ਨਵੰਬਰ, 2025 ਤੋਂ ਪਹਿਲਾਂ ਆਨਲਾਈਨ ਜਮ੍ਹਾਂ ਕਰਵਾਉਣੀ ਜ਼ਰੂਰੀ ਹੈ:

• ਖਾਤਾਧਾਰਕ: Comptroller GADVASU

• ਖਾਤਾ ਨੰਬਰ: 29380100015147

• IFSC-BARB0PAULUD

• ਬੈਂਕ: Bank of Baroda, PAU, Ludhiana

ਇਸ ਦੇ ਨਾਲ ਹੀ ਫੀਸ ਜਮ੍ਹਾਂ ਕਰਾਉਣ ਤੋਂ ਬਾਅਦ, ਰਸੀਦ ਦੀ ਕਾਪੀ ਅਤੇ ਹੋਰ ਲੋੜੀਂਦੀ ਜਾਣਕਾਰੀ (ਨਾਮ, ਪਤਾ, ਫੋਨ ਨੰਬਰ ਤੇ ਈ-ਮੇਲ) officetvec@gadvasu.in ‘ਤੇ ਭੇਜਣੀ ਹੋਵੇਗੀ।
ਮਹੱਤਵਪੂਰਨ ਨੋਟ: ਸਿਖਲਾਈ ਵਿੱਚ 13 ਬੇਰੁਜ਼ਗਾਰ ਨੌਜਵਾਨਾਂ ਅਤੇ 2 ਅਗਾਂਹਵਧੂ ਡੇਅਰੀ ਕਿਸਾਨਾਂ ਨੂੰ ਪਹਿਲਾਂ ਆਓ-ਪਹਿਲਾਂ ਪਾਓ ਦੇ ਆਧਾਰ ‘ਤੇ ਦਾਖਲਾ ਦਿੱਤਾ ਜਾਵੇਗਾ। ਬੋਰਡਿੰਗ ਅਤੇ ਰਿਹਾਇਸ਼ ਦਾ ਪ੍ਰਬੰਧ ਭਾਗੀਦਾਰਾਂ ਨੂੰ ਖੁਦ ਕਰਨਾ ਹੋਵੇਗਾ ਅਤੇ ਸਿਖਲਾਈ ਫੀਸ ਗੈਰ-ਵਾਪਸੀਯੋਗ ਹੈ।