ਪੰਜਾਬ ਫਾਰਮ ਟੂਰਿਜ਼ਮ ਸਕੀਮ: ਪੰਜਾਬ ਦੀ ਸੱਭਿਆਚਾਰਕ ਅਤੇ ਪੇਂਡੂ ਵਿਰਾਸਤ ਦਾ ਅਨੁਭਵ

ਪੰਜਾਬ, ਪ੍ਰਮੁੱਖ ਖੇਤੀਬਾੜੀ ਸੂਬਾ, ਹੁਣ ਖੇਤਾਂ ਅਤੇ ਪੇਂਡੂ ਜੀਵਨ ਰਾਹੀਂ ਸੈਲਾਨੀਆਂ ਨੂੰ ਇੱਕ ਵਿਲੱਖਣ ਅਨੁਭਵ ਦੇਣ ਲਈ ਤਿਆਰ ਹੈ। ਪੰਜਾਬ ਸਰਕਾਰ ਦੇ ਸੈਰ ਸਪਾਟਾ ਅਤੇ ਸੱਭਿਆਚਾਰਕ ਮਾਮਲੇ ਵਿਭਾਗ ਵੱਲੋਂ “ਪੰਜਾਬ ਫਾਰਮ ਟੂਰਿਜ਼ਮ ਸਕੀਮ” ਸ਼ੁਰੂ ਕੀਤੀ ਹੈ। ਇਸ ਸਕੀਮ ਦਾ ਉਦੇਸ਼ ਘਰੇਲੂ ਅਤੇ ਵਿਦੇਸ਼ੀ ਸੈਲਾਨੀਆਂ ਨੂੰ ਰਾਜ ਭਰ ਦੇ ਫਾਰਮ ਹਾਊਸਾਂ ਵਿੱਚ ਇੱਕ ਸਾਫ਼-ਸੁਥਰਾ, ਸਿਹਤਮੰਦ ਅਤੇ ਆਰਾਮਦਾਇਕ ਠਹਿਰਨ ਦਾ ਅਨੁਭਵ ਪ੍ਰਦਾਨ ਕਰਨਾ ਹੈ।

ਇਹ ਸੈਲਾਨੀਆਂ ਨੂੰ ਪੰਜਾਬੀ ਪਿੰਡਾਂ ਦੇ ਜੀਵਨ ਅਤੇ ਸੱਭਿਆਚਾਰਕ ਵਿਰਾਸਤ ਨਾਲ ਜੋੜਨ ਦਾ ਇੱਕ ਵਧੀਆ ਤਰੀਕਾ ਹੈ। ਇਹ ਸੰਕਲਪ ਕਿਸਾਨ ਭਾਈਚਾਰੇ ਲਈ ਆਮਦਨ ਦਾ ਇੱਕ ਵਾਧੂ ਸਰੋਤ ਪ੍ਰਦਾਨ ਕਰਕੇ ਉਨ੍ਹਾਂ ਦੀ ਮਦਦ ਕਰੇਗੀ। ਇਸ ਤਰ੍ਹਾਂ, ਇਹ ਸਕੀਮ ਫਾਰਮ ਟੂਰਿਜ਼ਮ, ਐਡਵੈਂਚਰ ਟੂਰਿਜ਼ਮ, ਪੇਂਡੂ ਅਤੇ ਸੱਭਿਆਚਾਰਕ ਟੂਰਿਜ਼ਮ ਦਾ ਇੱਕ ਸੰਪੂਰਨ ਪੈਕੇਜ ਪੇਸ਼ ਕਰਦੀ ਹੈ।

ਫਾਰਮ ਸਟੇਅ ਯੂਨਿਟ ਦੀ ਪਰਿਭਾਸ਼ਾ ਅਤੇ ਲਾਭ

ਇਸ ਸਕੀਮ ਦੇ ਅਨੁਸਾਰ, ਇੱਕ ਫਾਰਮ ਸਟੇਅ ਯੂਨਿਟ ਘੱਟੋ-ਘੱਟ 2.5 ਏਕੜ ਜਾਂ ਇਸ ਤੋਂ ਵੱਧ ਖੇਤਰ ਵਾਲੀ ਜਾਇਦਾਦ ਹੋਵੇਗੀ, ਜਿਸ ‘ਚ ਮਹਿਮਾਨਾਂ/ਸੈਲਾਨੀਆਂ ਦੇ ਆਰਾਮਦਾਇਕ ਠਹਿਰਨ ਲਈ ਢੁਕਵੀਂ ਰਿਹਾਇਸ਼ ਦਾ ਨਿਰਮਾਣ ਕੀਤਾ ਜਾਵੇਗਾ। ਉਸਾਰੀ ਪੰਜਾਬ ਸਰਕਾਰ ਦੇ ਹਾਊਸਿੰਗ ਅਤੇ ਸ਼ਹਿਰੀ ਵਿਕਾਸ ਵਿਭਾਗ ਦੁਆਰਾ ਨਿਰਧਾਰਤ ਨੀਤੀਆਂ ਅਤੇ ਸੀਮਾਵਾਂ ਦੀ ਪਾਲਣਾ ਕਰੇਗੀ।

ਇਸ ਸਕੀਮ ਅਧੀਨ ਰਜਿਸਟਰਡ ਫਾਰਮ ਸਟੇਅ ਯੂਨਿਟਾਂ ਦੇ ਮਾਲਕਾਂ ਨੂੰ ਕਈ ਮਹੱਤਵਪੂਰਨ ਲਾਭ ਪ੍ਰਾਪਤ ਹੋਣਗੇ:

ਆਮਦਨ ਦਾ ਵਾਧੂ ਸਰੋਤ: ਰਜਿਸਟਰਡ ਯੂਨਿਟਾਂ ਦੇ ਮਾਲਕਾਂ ਲਈ ਵਾਧੂ ਆਮਦਨ ਦਾ ਇੱਕ ਲਾਭਦਾਇਕ ਸਰੋਤ।

ਲੋਗੋ ਦੀ ਵਰਤੋਂ: ਰਜਿਸਟਰਡ ਯੂਨਿਟਾਂ ਨੂੰ ਆਪਣੇ ਸਾਈਨ ਬੋਰਡਾਂ ‘ਤੇ ਪੰਜਾਬ ਟੂਰਿਜ਼ਮ ਲੋਗੋ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਹੋਵੇਗੀ।

ਪ੍ਰਚਾਰ ਅਤੇ ਮਾਰਕੀਟਿੰਗ ਸਹਾਇਤਾ: ਸੈਰ ਸਪਾਟਾ ਵਿਭਾਗ (DoT) ਅਤੇ ਪੰਜਾਬ ਹੈਰੀਟੇਜ ਟੂਰਿਜ਼ਮ ਪ੍ਰਮੋਸ਼ਨ ਬੋਰਡ (PHTPB) ਵੱਲੋਂ ਮਾਰਕੀਟਿੰਗ ਵਿੱਚ ਸਹਾਇਤਾ ਮਿਲੇਗੀ, ਜਿਸ ਵਿੱਚ ਸ਼ਾਮਲ ਹਨ:

ਪੰਜਾਬ ਟੂਰਿਜ਼ਮ ਦੀ ਅਧਿਕਾਰਤ ਵੈੱਬਸਾਈਟ ‘ਤੇ ਪ੍ਰਚਾਰ।
ਟਰੈਵਲ ਲੇਖਕਾਂ ਦੁਆਰਾ ਮੀਡੀਆ ਕਵਰੇਜ।
ਬ੍ਰੋਸ਼ਰਾਂ/ਲੀਫਲੈੱਟਾਂ ਅਤੇ ਹੋਰ ਛਾਪੇ ਹੋਏ ਸਮੱਗਰੀ ਰਾਹੀਂ ਪ੍ਰਚਾਰ।
ਘਰੇਲੂ ਅਤੇ ਅੰਤਰਰਾਸ਼ਟਰੀ ਵਪਾਰਕ ਮੇਲਿਆਂ ਰਾਹੀਂ ਪ੍ਰਚਾਰ, ਜਿੱਥੇ ਰਜਿਸਟਰਡ ਮਾਲਕਾਂ ਨੂੰ ਮੁਫ਼ਤ ਥਾਂ ਪ੍ਰਦਾਨ ਕੀਤੀ ਜਾਵੇਗੀ।

FTS ਸਰਟੀਫਿਕੇਟ (Farm Tourism Scheme Certificate) PHTPB ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਦੁਆਰਾ ਜਾਰੀ ਕੀਤਾ ਜਾਵੇਗਾ ਅਤੇ ਇਸਦੀ ਮਿਆਦ ਲਾਈਫਟਾਈਮ ਹੋਵੇਗੀ।

ਰਜਿਸਟ੍ਰੇਸ਼ਨ ਲਈ ਯੋਗਤਾ ਮਾਪਦੰਡ

ਫਾਰਮ ਸਟੇਅ ਯੂਨਿਟਾਂ ਦੀ ਰਜਿਸਟ੍ਰੇਸ਼ਨ ਦੋ ਸ਼੍ਰੇਣੀਆਂ ਵਿੱਚ ਕੀਤੀ ਜਾਵੇਗੀ: ਗੋਲਡ ਸ਼੍ਰੇਣੀ ਅਤੇ ਸਿਲਵਰ ਸ਼੍ਰੇਣੀ।

ਗੋਲਡ ਸ਼੍ਰੇਣੀ ਲਈ ਯੋਗਤਾ

ਗੋਲਡ ਸ਼੍ਰੇਣੀ ਲਈ, ਫਾਰਮ ਸਟੇਅ ਯੂਨਿਟਾਂ ਕੋਲ ਹੋਣਾ ਚਾਹੀਦਾ ਹੈ:

5 ਏਕੜ ਤੋਂ ਵੱਧ ਦਾ ਖੇਤਰ, ਜਿਸ ਵਿੱਚ ਨਿਰਧਾਰਤ ਮਾਪਦੰਡਾਂ ਅਨੁਸਾਰ 9 ਤੋਂ ਵੱਧ ਕਿਰਾਏ ‘ਤੇ ਲੈਣ ਵਾਲੇ ਕਮਰੇ (18 ਬੈੱਡਾਂ) ਦੀ ਆਰਾਮਦਾਇਕ ਰਿਹਾਇਸ਼ ਬਣੀ ਹੋਵੇ।

ਸੈਲਾਨੀਆਂ ਨੂੰ ਪੱਕਿਆ ਹੋਇਆ ਭੋਜਨ ਪ੍ਰਦਾਨ ਕਰਨ ਦੀ ਸਹੂਲਤ।

ਭੋਜਨ ਨੂੰ ਸਿਹਤਮੰਦ ਤਰੀਕੇ ਨਾਲ ਸਟੋਰ ਕਰਨ ਦੀ ਸਹੂਲਤ।

ਯੂਨਿਟ ਦਾ ਪ੍ਰਬੰਧਨ ਇੱਕ ਮੈਨੇਜਰ ਦੁਆਰਾ ਵੀ ਕੀਤਾ ਜਾ ਸਕਦਾ ਹੈ।

ਸਿਲਵਰ ਸ਼੍ਰੇਣੀ ਲਈ ਯੋਗਤਾ

ਸਿਲਵਰ ਸ਼੍ਰੇਣੀ ਲਈ, ਫਾਰਮ ਸਟੇਅ ਯੂਨਿਟਾਂ ਕੋਲ ਹੋਣਾ ਚਾਹੀਦਾ ਹੈ:

5 ਏਕੜ ਤੱਕ ਦਾ ਖੇਤਰ, ਜਿਸ ਵਿੱਚ ਨਿਰਧਾਰਤ ਮਾਪਦੰਡਾਂ ਅਨੁਸਾਰ 9 ਤੋਂ ਵੱਧ ਕਿਰਾਏ ‘ਤੇ ਲੈਣ ਵਾਲੇ ਕਮਰੇ (18 ਬੈੱਡਾਂ) ਦੀ ਆਰਾਮਦਾਇਕ ਰਿਹਾਇਸ਼ ਬਣੀ ਹੋਵੇ।

ਸੈਲਾਨੀਆਂ ਨੂੰ ਪੱਕਿਆ ਹੋਇਆ ਭੋਜਨ ਪ੍ਰਦਾਨ ਕਰਨ ਦੀ ਸਹੂਲਤ।

ਭੋਜਨ ਨੂੰ ਸਿਹਤਮੰਦ ਤਰੀਕੇ ਨਾਲ ਸਟੋਰ ਕਰਨ ਦੀ ਸਹੂਲਤ।

ਯੂਨਿਟ ਦਾ ਸੰਚਾਲਨ ਸਿਰਫ਼ ਮਾਲਕ ਦੁਆਰਾ ਹੀ ਕੀਤਾ ਜਾਣਾ ਚਾਹੀਦਾ ਹੈ।

ਯੂਨਿਟ ਕਿਸੇ ਵੀ ਮੌਜੂਦਾ ਪਿੰਡ ਦੇ ਘਰ ਵਿੱਚ ਵੀ ਚਲਾਈ ਜਾ ਸਕਦੀ ਹੈ।

ਹੋਰ ਆਮ ਸ਼ਰਤਾਂ

ਰਜਿਸਟਰਡ ਯੂਨਿਟਾਂ ਅੰਤਰਰਾਸ਼ਟਰੀ ਸੈਲਾਨੀਆਂ ਲਈ ਉੱਚ ਪੱਧਰੀ ਆਰਾਮ ਅਨੁਸਾਰ ਤਿਆਰ ਅਤੇ ਸਜਾਈਆਂ ਜਾਣ। ਹਰ ਬੈੱਡਰੂਮ ਵਿੱਚ ਸਾਫ਼ ਅਟੈਚਡ ਬਾਥਰੂਮ (24 ਘੰਟੇ ਗਰਮ/ਠੰਡਾ ਪਾਣੀ ਅਤੇ ਵੈਸਟਰਨ ਟਾਇਲਟ), ਢੁਕਵੀਂ ਰੋਸ਼ਨੀ/ਹਵਾਦਾਰੀ ਅਤੇ ਬਿਜਲੀ ਬੈਕਅੱਪ ਹੋਣਾ ਜ਼ਰੂਰੀ ਹੈ।

ਇਮਾਰਤ ਢਾਂਚਾਗਤ ਤੌਰ ‘ਤੇ ਸੁਰੱਖਿਅਤ, ਵਧੀਆ ਹਾਲਤ ਵਿੱਚ ਹੋਵੇ ਅਤੇ ਸਫਾਈ, ਸਵੱਛਤਾ ਤੇ ਸੁਰੱਖਿਆ ਦੇ ਉੱਚ ਮਿਆਰ ਪੂਰੇ ਕਰੇ। ਸੈਲਾਨੀਆਂ ਨੂੰ ਠਹਿਰਨ ਦੌਰਾਨ ਖੇਤਾਂ ਵਿੱਚ ਘੁੰਮਣ ਦੀ ਇਜਾਜ਼ਤ ਮਿਲੇਗੀ, ਅਤੇ ਕਿਰਇਆ ਦਰਾਂ ਤੈਅ ਕਰਨ ਦਾ ਅਧਿਕਾਰ ਮਾਲਕ ਕੋਲ ਰਹੇਗਾ।

ਅਰਜ਼ੀ ਪ੍ਰਕਿਰਿਆ ਅਤੇ ਫੀਸ

ਫਾਰਮ ਸਟੇਅ ਯੂਨਿਟ ਵਜੋਂ ਰਜਿਸਟ੍ਰੇਸ਼ਨ ਲਈ ਚਾਹਵਾਨ ਜਾਇਦਾਦਾਂ ਦੇ ਮਾਲਕਾਂ ਨੂੰ ਸੈਰ ਸਪਾਟਾ ਵਿਭਾਗ ਦੇ ਵੈੱਬ ਪੋਰਟਲ (https://punjabtourism.punjab.gov.in/) ‘ਤੇ ਆਨਲਾਈਨ ਅਪਲਾਈ ਕਰਨਾ ਹੋਵੇਗਾ।

ਅਰਜ਼ੀ ਪ੍ਰਕਿਰਿਆ ਦੇ ਮੁੱਖ ਕਦਮ:

ਅਧਿਕਾਰਤ ਪੋਰਟਲ ‘ਤੇ ਜਾਓ ਅਤੇ ਹੋਮ ਪੇਜ ਦੇ ਮੱਧ ਵਿੱਚ ‘Farm Stay Scheme’ ‘ਤੇ ਕਲਿੱਕ ਕਰੋ।

ਜੇਕਰ ਰਜਿਸਟਰਡ ਨਹੀਂ ਹੋ ਤਾਂ ‘Register Yourself’ ‘ਤੇ ਕਲਿੱਕ ਕਰਕੇ ਲਾਜ਼ਮੀ ਵੇਰਵੇ ਭਰੋ।

ਸਫਲ ਰਜਿਸਟ੍ਰੇਸ਼ਨ ਤੋਂ ਬਾਅਦ, “Apply for Service” ‘ਤੇ ਕਲਿੱਕ ਕਰੋ ਅਤੇ ‘Online’ ਚੁਣੋ।

ਆਪਣੇ ਲੌਗਇਨ ਆਈ.ਡੀ. ਅਤੇ ਪਾਸਵਰਡ ਰਾਹੀਂ ਲੌਗਇਨ ਕਰੋ।

ਅਰਜ਼ੀ ਫਾਰਮ ਭਰੋ ਅਤੇ ਸਾਰੇ ਲੋੜੀਂਦੇ ਦਸਤਾਵੇਜ਼ ਅੱਪਲੋਡ ਕਰਕੇ ਫਾਰਮ ਜਮ੍ਹਾਂ ਕਰੋ।

ਅਰਜ਼ੀ ਫੀਸ ਪੰਜਾਬ ਹੈਰੀਟੇਜ ਐਂਡ ਟੂਰਿਜ਼ਮ ਪ੍ਰਮੋਸ਼ਨ ਬੋਰਡ ਦੇ ਖਾਤੇ ਵਿੱਚ ਆਨਲਾਈਨ ਜਮ੍ਹਾਂ ਕਰਵਾਓ ਅਤੇ ਇਸਦਾ ਸਬੂਤ ਵੈੱਬਸਾਈਟ ‘ਤੇ ਅੱਪਲੋਡ ਕਰੋ।

ਅਰਜ਼ੀ ਫੀਸ (ਗੈਰ-ਵਾਪਸੀਯੋਗ):
ਗੋਲਡ ਸ਼੍ਰੇਣੀ: ₹5,000/
ਸਿਲਵਰ ਸ਼੍ਰੇਣੀ: ₹3,000/

ਸੰਪੂਰਨ ਅਰਜ਼ੀ ਮਿਲਣ ‘ਤੇ, ਈਮੇਲ ਭੇਜੀ ਜਾਵੇਗੀ। CEO, PHTPB ਦੀ ਪ੍ਰਵਾਨਗੀ ਤੋਂ ਬਾਅਦ, 7 ਕਾਰਜਕਾਰੀ ਦਿਨਾਂ ਦੇ ਅੰਦਰ ਆਟੋ-ਤਿਆਰ ਰਜਿਸਟ੍ਰੇਸ਼ਨ ਸਰਟੀਫਿਕੇਟ ਆਨਲਾਈਨ ਜਾਰੀ ਕੀਤਾ ਜਾਵੇਗਾ। ਜੇਕਰ ਸਮੇਂ ਸਿਰ ਸਰਟੀਫਿਕੇਟ ਜਾਰੀ ਨਹੀਂ ਹੁੰਦਾ, ਤਾਂ ਜਾਇਦਾਦ ਰਜਿਸਟਰਡ ਮੰਨੀ ਜਾਵੇਗੀ।

ਪਾਲਣਾ, ਰਿਪੋਰਟਿੰਗ ਅਤੇ ਰੱਦ ਕਰਨ ਦੀਆਂ ਸ਼ਰਤਾਂ

ਰਜਿਸਟਰਡ ਫਾਰਮ ਸਟੇਅ ਯੂਨਿਟਾਂ ਨੂੰ ਹਰ ਸਮੇਂ ਨਿਰਧਾਰਤ ਮਾਪਦੰਡਾਂ ਨੂੰ ਬਣਾਈ ਰੱਖਣ ਦੀ ਲੋੜ ਹੋਵੇਗੀ। CEO, PHTPB ਜਾਂ ਕੋਈ ਹੋਰ ਅਧਿਕਾਰਤ ਅਧਿਕਾਰੀ ਬਿਨਾਂ ਕਿਸੇ ਪੂਰਵ ਸੂਚਨਾ ਦੇ ਸਵੇਰੇ 9.00 ਵਜੇ ਤੋਂ ਸ਼ਾਮ 5.00 ਵਜੇ ਦੇ ਵਿਚਕਾਰ ਕਿਸੇ ਵੀ ਸਮੇਂ ਅਚਾਨਕ ਨਿਰੀਖਣ ਕਰ ਸਕਦਾ ਹੈ।

ਰਿਪੋਰਟਿੰਗ

ਰਜਿਸਟਰਡ ਯੂਨਿਟਾਂ ਦੇ ਮਾਲਕਾਂ ਨੂੰ ਮਹਿਮਾਨਾਂ ਦੀ ਗਿਣਤੀ ਬਾਰੇ ਤਿਮਾਹੀ ਰਿਪੋਰਟ ਆਨਲਾਈਨ ਜਮ੍ਹਾਂ ਕਰਵਾਉਣੀ ਪਵੇਗੀ। ਇਸ ਤੋਂ ਇਲਾਵਾ, ਹਰ 3 ਸਾਲਾਂ ਬਾਅਦ ਪ੍ਰਦਾਨ ਕੀਤੀਆਂ ਜਾ ਰਹੀਆਂ ਸਹੂਲਤਾਂ ਬਾਰੇ ਸਵੈ-ਘੋਸ਼ਣਾ ਵੀ ਫਾਈਲ ਕਰਨੀ ਹੋਵੇਗੀ।

ਰਜਿਸਟ੍ਰੇਸ਼ਨ ਰੱਦ ਕਰਨਾ

ਸਕੀਮ ਦੀਆਂ ਸ਼ਰਤਾਂ ਦੀ ਉਲੰਘਣਾ, ਗਲਤ ਜਾਣਕਾਰੀ, ਸਮੇਂ ਸਿਰ ਰਿਪੋਰਟਾਂ ਜਮ੍ਹਾਂ ਨਾ ਕਰਵਾਉਣ, ਯੂਨਿਟ ‘ਤੇ ਗੈਰ-ਕਾਨੂੰਨੀ ਗਤੀਵਿਧੀ ਜਾਂ ਸਹੀ ਗਾਹਕ ਸ਼ਿਕਾਇਤਾਂ ਕਾਰਨ CEO, PHTPB ਵੱਲੋਂ ਰਜਿਸਟ੍ਰੇਸ਼ਨ ਰੱਦ ਕੀਤੀ ਜਾ ਸਕਦੀ ਹੈ। ਮਾਲਕੀ ਬਦਲਣ ‘ਤੇ ਫਾਰਮ ਸਟੇਅ ਸਰਟੀਫਿਕੇਟ ਆਪਣੇ ਆਪ ਰੱਦ ਹੋ ਜਾਵੇਗਾ।

ਲੋੜੀਂਦੇ ਦਸਤਾਵੇਜ਼

ਅਰਜ਼ੀ ਦੇ ਨਾਲ ਹੇਠ ਲਿਖੇ ਦਸਤਾਵੇਜ਼ ਅੱਪਲੋਡ ਕੀਤੇ ਜਾਣੇ ਜ਼ਰੂਰੀ ਹਨ:
ਸਹੂਲਤਾਂ ਦੀ ਚੈੱਕਲਿਸਟ (Annexure-II)।
ਹਸਤਾਖਰਿਤ ਘੋਸ਼ਣਾ (Annexure – III)।
ਵਾਧੂ ਪਿਛੋਕੜ ਦੀ ਜਾਣਕਾਰੀ, ਜੇਕਰ ਕੋਈ ਹੋਵੇ (Annexure – IV)।
ਜਾਇਦਾਦ ਅਤੇ ਕਿਰਾਏ ‘ਤੇ ਦਿੱਤੇ ਜਾਣ ਵਾਲੇ ਕਮਰਿਆਂ ਦੀਆਂ ਰੰਗੀਨ ਤਸਵੀਰਾਂ।
ਮੈਡੀਕਲ ਐਮਰਜੈਂਸੀ ਵਿੱਚ ਸਹਾਇਤਾ ਅਤੇ ਆਵਾਜਾਈ ਦੀ ਸਹੂਲਤ ਦੇਣ ਦਾ ਹਲਫੀਆ ਬਿਆਨ।
ਮਹਿਮਾਨਾਂ/ਸੈਲਾਨੀਆਂ ਨੂੰ ਪੇਸ਼ ਕੀਤੇ ਜਾਣ ਵਾਲੇ ਕਮਰਿਆਂ ਨੂੰ ਦਰਸਾਉਂਦਾ ਫਾਰਮ ਹਾਊਸ ਦਾ ਪ੍ਰਵਾਨਿਤ ਲੇਆਉਟ।
ਜਾਇਦਾਦ ਦੇ ਮਾਲਕੀ ਦਸਤਾਵੇਜ਼ਾਂ ਦੀ ਕਾਪੀ (ਗਰੁੱਪ-ਏ ਅਫਸਰ ਜਾਂ ਪਬਲਿਕ ਨੋਟਰੀ ਦੁਆਰਾ ਤਸਦੀਕਸ਼ੁਦਾ)।
ਮਾਲਕ ਦਾ ਫੋਟੋ ਪਛਾਣ ਸਬੂਤ (ਪਾਸਪੋਰਟ, ਡਰਾਈਵਿੰਗ ਲਾਇਸੈਂਸ, ਆਦਿ)।
ਮਾਲਕੀ ਦਾ ਸਬੂਤ (NOC) ਸਵੈ-ਪ੍ਰਮਾਣਿਤ।
ਲੋੜੀਂਦੀ ਫੀਸ ਅਦਾ ਕਰਨ ਦਾ ਸਬੂਤ।

ਪੰਜਾਬ ਫਾਰਮ ਟੂਰਿਜ਼ਮ ਸਕੀਮ ਸੈਰ-ਸਪਾਟੇ ਦੇ ਨਾਲ-ਨਾਲ ਪੇਂਡੂ ਆਰਥਿਕਤਾ ਨੂੰ ਵੀ ਮਜ਼ਬੂਤ ਕਰਦੀ ਹੈ, ਜੋ ਕਿ ਸੂਬੇ ਦੇ ਵਿਕਾਸ ਲਈ ਇੱਕ ਮਹੱਤਵਪੂਰਨ ਕਦਮ ਹੈ।