ਅੱਜ ਦੇ ਸਮੇਂ ਵਿੱਚ ਵਿਟਾਮਿਨ ਡੀ ਦੀ ਕਮੀ ਇੱਕ ਵੱਡੀ ਗੰਭੀਰ ਸਿਹਤ ਸਮੱਸਿਆ ਬਣ ਗਈ ਹੈ। ਇਸ ਚੁਣੌਤੀ ਦਾ ਵਿਗਿਆਨਕ ਹੱਲ ਲੱਭਦਿਆਂ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (PAU), ਲੁਧਿਆਣਾ ਨੇ
ਅੱਜ ਦੇ ਸਮੇਂ ਵਿੱਚ ਵਿਟਾਮਿਨ ਡੀ ਦੀ ਕਮੀ ਇੱਕ ਵੱਡੀ ਗੰਭੀਰ ਸਿਹਤ ਸਮੱਸਿਆ ਬਣ ਗਈ ਹੈ। ਇਸ ਚੁਣੌਤੀ ਦਾ ਵਿਗਿਆਨਕ ਹੱਲ ਲੱਭਦਿਆਂ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (PAU), ਲੁਧਿਆਣਾ ਨੇ ਇੱਕ ਅਹਿਮ ਪ੍ਰਾਪਤੀ ਹਾਸਲ ਕੀਤੀ ਹੈ। ਯੂਨੀਵਰਸਿਟੀ ਨੇ ਵਿਟਾਮਿਨ ਡੀ ਨਾਲ ਭਰਪੂਰ ਖੁੰਬਾਂ ਦੇ ਪਾਊਡਰ ਦੀ ਤਕਨਾਲੋਜੀ ਨੂੰ ਵਪਾਰਕ ਪੱਧਰ ‘ਤੇ ਲੋਕਾਂ ਤੱਕ ਪਹੁੰਚਾਉਣ ਲਈ “ਅਗਮ ਅਰਥ ਫੂਡਜ਼” (Agam Earth Foods) ਨਾਂ ਦੀ ਫਰਮ ਨਾਲ ਇੱਕ ਵਿਸ਼ੇਸ਼ ਸਮਝੌਤਾ ਪੱਤਰ ‘ਤੇ ਹਸਤਾਖਰ ਕੀਤੇ ਹਨ।
ਸਮਝੌਤੇ ਦੇ ਮੁੱਖ ਵੇਰਵੇ
ਇਸ ਸਮਝੌਤੇ ‘ਤੇ PAU ਦੇ ਨਿਰਦੇਸ਼ਕ ਖੋਜ ਡਾ. ਅਜਮੇਰ ਸਿੰਘ ਢੱਟ ਅਤੇ ਅਗਮ ਅਰਥ ਫੂਡਜ਼ ਦੇ ਨੁਮਾਇੰਦੇ ਸ਼੍ਰੀ ਰਿਪੁਦਮਨ ਸਿੰਘ ਨੇ ਹਸਤਾਖਰ ਕੀਤੇ। ਇਸ ਸਮਝੌਤੇ ਦੇ ਤਹਿਤ ਯੂਨੀਵਰਸਿਟੀ ਨੇ ਸੰਬੰਧਿਤ ਫਰਮ ਨੂੰ ਵਿਟਾਮਿਨ-ਡੀ ਭਰਪੂਰ ਖੁੰਬਾਂ ਦੇ ਪਾਊਡਰ ਦੇ ਉਤਪਾਦਨ ਅਤੇ ਵਪਾਰੀਕਰਨ ਦੇ ਅਧਿਕਾਰ ਦਿੱਤੇ ਹਨ।
ਇਸ ਮੌਕੇ ‘ਤੇ ਖੇਤੀਬਾੜੀ ਅਤੇ ਬਾਗਬਾਨੀ ਦੇ ਵਧੀਕ ਨਿਰਦੇਸ਼ਕ ਡਾ. ਗੁਰਜੀਤ ਸਿੰਘ ਮਾਂਗਟ, ਡਾ. ਮਹੇਸ਼ ਕੁਮਾਰ, ਡਾ. ਦੀਪਿਕਾ ਵਿੱਗ ਅਤੇ ਤਕਨਾਲੋਜੀ ਵਪਾਰੀਕਰਨ ਸੈੱਲ ਦੇ ਸਹਿਯੋਗੀ ਨਿਰਦੇਸ਼ਕ ਡਾ. ਖੁਸ਼ਦੀਪ ਧਰਨੀ ਵੀ ਹਾਜ਼ਰ ਸਨ। ਜ਼ਿਕਰਯੋਗ ਸੰਬੰਧਿਤ ਅਧਿਕਾਰੀਆਂ ਨੇ ਇਸ ਤਕਨਾਲੋਜੀ ਨੂੰ ਵਿਕਸਿਤ ਕਰਨ ਵਾਲੇ ਭੋਜਨ ਅਤੇ ਪੋਸ਼ਣ ਵਿਭਾਗ ਦੇ ਮਾਹਿਰ ਡਾ. ਸੋਨਿਕਾ ਸ਼ਰਮਾ ਨੂੰ ਵਧਾਈ ਦਿੱਤੀ।
ਵਿਗਿਆਨਕ ਤਕਨੀਕ: ਖੁੰਬਾਂ ਵਿੱਚ 400 ਗੁਣਾ ਵੱਧ ਵਿਟਾਮਿਨ ਡੀ
ਇਸ ਦੇ ਨਾਲ ਹੀ ਡਾ. ਸੋਨਿਕਾ ਸ਼ਰਮਾ ਨੇ ਦੱਸਿਆ ਕਿ ਖੁੰਬਾਂ ਅਜਿਹਾ ਸ਼ਾਕਾਹਾਰੀ ਭੋਜਨ ਹੈ ਜਿਸ ਵਿੱਚ ਕੁਦਰਤੀ ਤੌਰ ‘ਤੇ ਵਿਟਾਮਿਨ ਡੀ ਪਾਇਆ ਜਾਂਦਾ ਹੈ। ਯੂਨੀਵਰਸਿਟੀ ਦੀ ਨਵੀਂ ਤਕਨੀਕ ਰਾਹੀਂ, ਜਦੋਂ ਬਟਨ ਜਾਂ ਢੀਂਗਰੀ ਖੁੰਬਾਂ ਨੂੰ ਖ਼ਾਸ ਅਲਟਰਾ ਵਾਇਲਟ (UV) ਕਿਰਨਾਂ ਅਤੇ ਸੂਰਜੀ ਧੁੱਪ ਦੇ ਸੰਪਰਕ ਵਿੱਚ ਲਿਆਂਦਾ ਜਾਂਦਾ ਹੈ, ਤਾਂ ਇਨ੍ਹਾਂ ਵਿੱਚ ਵਿਟਾਮਿਨ ਡੀ ਦੀ ਮਾਤਰਾ 400 ਗੁਣਾ ਤੱਕ ਵੱਧ ਜਾਂਦੀ ਹੈ।
ਇਹ ਪਾਊਡਰ ਨਾ ਸਿਰਫ਼ ਵਿਟਾਮਿਨ ਡੀ ਦਾ ਖ਼ਜ਼ਾਨਾ ਹੈ, ਸਗੋਂ ਇਸ ਵਿੱਚ ਪ੍ਰੋਟੀਨ, ਫਾਈਬਰ ਅਤੇ ਆਇਰਨ, ਫਾਸਫੋਰਸ, ਪੋਟਾਸ਼ੀਅਮ, ਜ਼ਿੰਕ ਅਤੇ ਸਲੇਨੀਅਮ ਵਰਗੇ ਜ਼ਰੂਰੀ ਖਣਿਜ ਵੀ ਭਰਪੂਰ ਮਾਤਰਾ ਵਿੱਚ ਮੌਜੂਦ ਹੁੰਦੇ ਹਨ। ਇਹ ਉਨ੍ਹਾਂ ਲੋਕਾਂ ਲਈ ਵਰਦਾਨ ਸਾਬਤ ਹੋਵੇਗਾ ਜੋ ਗੋਲੀਆਂ ਜਾਂ ਕੈਪਸੂਲ ਦੀ ਥਾਂ ਕੁਦਰਤੀ ਭੋਜਨ ਰਾਹੀਂ ਆਪਣੀ ਸਿਹਤ ਨੂੰ ਬਿਹਤਰ ਬਣਾਉਣਾ ਚਾਹੁੰਦੇ ਹਨ।
ਕਿਸਾਨਾਂ ਦੀ ਆਮਦਨ ‘ਚ ਵਾਧਾ ਅਤੇ ਮੁੱਲ ਵਾਧਾ
ਪੰਜਾਬ ਵਿੱਚ ਸਰਦੀਆਂ ਦੇ ਸੀਜ਼ਨ ਦੌਰਾਨ ਖੁੰਬਾਂ ਦੀ ਬਹੁਤ ਜ਼ਿਆਦਾ ਪੈਦਾਵਾਰ ਹੁੰਦੀ ਹੈ, ਜਿਸ ਕਾਰਨ ਮੰਡੀ ਵਿੱਚ ਭਾਅ ਘੱਟ ਮਿਲਦਾ ਹੈ। ਖੁੰਬਾਂ ਜਲਦੀ ਖ਼ਰਾਬ ਹੋਣ ਵਾਲੀ ਫ਼ਸਲ ਹੈ, ਇਸ ਲਈ ਇਨ੍ਹਾਂ ਦੀ “ਪ੍ਰੋਸੈਸਿੰਗ” ਕਰਨਾ ਬਹੁਤ ਜ਼ਰੂਰੀ ਹੈ। ਇਸ ਤੋਂ ਇਲਾਵਾ, ਡਾ. ਸ਼ਰਮਾ ਨੇ ਦੱਸਿਆ ਕਿ ਖੁੰਬਾਂ ਦਾ ਪਾਊਡਰ ਤਿਆਰ ਕਰਨ ਨਾਲ ਕਿਸਾਨਾਂ ਨੂੰ ਸਾਰਾ ਸਾਲ ਆਮਦਨ ਮਿਲ ਸਕੇਗੀ। ਜਦੋਂ ਮੰਡੀ ਵਿੱਚ ਤਾਜ਼ੀ ਖੁੰਬ ਦੀ ਮੰਗ ਘੱਟ ਹੋਵੇ, ਤਾਂ ਕਿਸਾਨ ਉਸ ਨੂੰ ਪਾਊਡਰ ਵਿੱਚ ਬਦਲ ਕੇ ਵਧੀਆ ਮੁਨਾਫ਼ਾ ਕਮਾ ਸਕਦੇ ਹਨ।
ਵਪਾਰਕ ਸਫਲਤਾ ਅਤੇ ਭਵਿੱਖ
ਤਕਨਾਲੋਜੀ ਮਾਰਕੀਟਿੰਗ ਸੈੱਲ ਦੇ ਸਹਿਯੋਗੀ ਨਿਰਦੇਸ਼ਕ ਡਾ. ਖੁਸ਼ਦੀਪ ਧਰਨੀ ਨੇ ਕਿਹਾ ਕਿ ਇਹ ਤਕਨੀਕ ਜ਼ਮੀਨੀ ਪੱਧਰ ‘ਤੇ ਬਹੁਤ ਸਫਲ ਰਹੀ ਹੈ, ਜਿਸ ਦਾ ਸਬੂਤ ਇਹ ਹੈ ਕਿ ਪੰਜਵੀਂ ਵਾਰ ਕਿਸੇ ਨਿੱਜੀ ਫਰਮ ਨੇ ਇਸ ਦੇ ਵਪਾਰੀਕਰਨ ਵਿੱਚ ਦਿਲਚਸਪੀ ਦਿਖਾਈ ਹੈ। PAU ਲਗਾਤਾਰ ਅਜਿਹੀਆਂ ਤਕਨੀਕਾਂ ‘ਤੇ ਕੰਮ ਕਰ ਰਿਹਾ ਹੈ ਜੋ ਨਾ ਸਿਰਫ਼ ਖੇਤੀਬਾੜੀ ਨੂੰ ਲਾਹੇਵੰਦ ਬਣਾਉਣਗੀਆਂ, ਸਗੋਂ ਆਮ ਲੋਕਾਂ ਨੂੰ ਪੌਸ਼ਟਿਕ ਭੋਜਨ ਵੀ ਪ੍ਰਦਾਨ ਕਰਨਗੀਆਂ। ਇਹ ਸਮਝੌਤਾ ਪੰਜਾਬ ਵਿੱਚ ਖੇਤੀ-ਉਦਯੋਗ ਲਈ ਅਹਿਮ ਹੈ, ਜੋ ਖੁੰਬ ਉਤਪਾਦਕਾਂ ਸਮੇਤ ਵਿਟਾਮਿਨ ਡੀ ਦੀ ਕਮੀ ਨੂੰ ਕੁਦਰਤੀ ਤਰੀਕੇ ਨਾਲ ਦੂਰ ਕਰਨ ਵਿੱਚ ਮਦਦਗਾਰ ਹੋਵੇਗਾ।
COMMENTS