Palm Tree ਦੀ ਖੇਤੀ ਦਾ ਕਮਾਲ: ਫ਼ਿਰੋਜ਼ਪੁਰ ਦੇ ਤਿੰਨ ਭਰਾਵਾਂ ਨੇ ਉਗਾਇਆ ‘ਹਰਾ ਸੋਨਾ’

ਪੰਜਾਬ ਵਿੱਚ ਜਿੱਥੇ ਰਵਾਇਤੀ ਖੇਤੀ (ਕਣਕ-ਝੋਨਾ) ਹੁਣ ਕਿਸਾਨਾਂ ਲਈ ਸਿਰਫ਼ ਰੋਜ਼ੀ-ਰੋਟੀ ਦਾ ਸਾਧਨ ਬਣ ਗਈ ਹੈ, ਉੱਥੇ ਹੀ ਫ਼ਿਰੋਜ਼ਪੁਰ ਜ਼ਿਲ੍ਹੇ ਦੇ ਪਿੰਡ ਟਿੱਬੀ ਕਲਾਂ ਦੇ ਤਿੰਨ ਭਰਾਵਾਂ ਨੇ ਇੱਕ ਬਿਲਕੁਲ ਵੱਖਰਾ ਰਾਹ ਚੁਣ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਚਚੇਰੇ ਭਰਾਵਾਂ ਜਸਵਿੰਦਰ ਸਿੰਘ, ਵਰਿੰਦਰ ਸਿੰਘ ਅਤੇ ਗੁਰਜੰਟ ਸਿੰਘ ਨੇ ਪੰਜਾਬ ਵਿੱਚ ਬਿਲਕੁਲ ਅਣਸੁਣੇ ‘Palm Tree’ (ਖਜੂਰ ਦੇ ਬੂਟੇ) ਦੀ ਖੇਤੀ ਕਰਕੇ ਸਿਰਫ਼ ਇੱਕ ਏਕੜ ਵਿੱਚੋਂ ਚਾਰ ਸਾਲਾਂ ਦੌਰਾਨ ₹1.5 ਕਰੋੜ ਦੀ ਕਮਾਈ ਕੀਤੀ ਹੈ, ਜੋ ਕਿ ਪ੍ਰਤੀ ਏਕੜ ₹37.5 ਲੱਖ ਸਾਲਾਨਾ ਬਣਦੀ ਹੈ। ਇਹ ਨਿਵੇਕਲੀ ਖੇਤੀ ਅੱਜ ਦੇ ਦੌਰ ਵਿੱਚ, ਦੂਜੇ ਨੌਜਵਾਨ ਕਿਸਾਨਾਂ ਲਈ ਵੀ ਆਮਦਨ ਵਧਾਉਣ ਦਾ ਇੱਕ ਵਧੀਆ ਮਾਡਲ ਸਾਬਤ ਹੋ ਰਹੀ ਹੈ।

ਰਵਾਇਤੀ ਲੀਹਾਂ ਤੋਂ ਹੱਟ ਕੇ ਨਵੇਂ ਪ੍ਰਯੋਗ

ਲਗਭਗ 8-8 ਏਕੜ  ਏਕੜ ਜ਼ਮੀਨ ਦੇ ਮਾਲਕ, ਇਹ ਭਰਾ ਪਹਿਲਾਂ ਕਣਕ ਅਤੇ ਝੋਨਾ ਹੀ ਬੀਜਦੇ ਸਨ। ਪਰ ਸਾਲ 2017 ਵਿੱਚ, ਉਨ੍ਹਾਂ ਨੇ ਕੁਝ ਵੱਖਰਾ ਅਤੇ ਰਚਨਾਤਮਕ ਕਰਨ ਬਾਰੇ ਸੋਚਿਆ। ਗ੍ਰੈਜੂਏਟ ਜਸਵਿੰਦਰ ਸਿੰਘ ਦੱਸਦੇ ਹਨ ਕਿ ਉਹ ਹਮੇਸ਼ਾ ਖੇਤੀ ਵਿੱਚ ਨਵੀਆਂ ਤਕਨੀਕਾਂ ਨਾਲ ਪ੍ਰਯੋਗ ਕਰਦੇ ਰਹੇ ਹਨ। ਫੁੱਲਾਂ ਅਤੇ ਮਸ਼ਰੂਮ ਦੀ ਖੇਤੀ ਅਜ਼ਮਾਉਣ ਤੋਂ ਬਾਅਦ, ਉਨ੍ਹਾਂ ਨੇ ਪਾਮ ਦੇ ਬੂਟੇ ਲਗਾਉਣ ਦਾ ਫੈਸਲਾ ਕੀਤਾ ਅਤੇ ਆਪਣੀ ਇਸ ਪਹਿਲ ਦਾ ਨਾਂ ‘The Palm Garden Store’ ਰੱਖਿਆ।

ਸ਼ੁਰੂਆਤ ਵਿੱਚ, ਉਨ੍ਹਾਂ ਨੇ ਕੋਲਕਾਤਾ ਤੋਂ ₹37 ਪ੍ਰਤੀ ਬੂਟੇ ਦੇ ਹਿਸਾਬ ਨਾਲ ਪਾਮ ਦੇ ਛੋਟੇ ਬੂਟੇ ਖ਼ਰੀਦ, ਜਿਸ ਵਿੱਚ ਆਵਾਜਾਈ ਦੀ ਲਾਗਤ ਵੀ ਸ਼ਾਮਲ ਸੀ। ਉਨ੍ਹਾਂ ਨੇ 2 ਏਕੜ ਵਿੱਚ ਵੱਖ-ਵੱਖ ਕਿਸਮਾਂ ਦੇ ਲਗਭਗ 10,000 ਬੂਟੇ ਲਗਾਏ ਅਤੇ 6 ਤੋਂ 7 ਕਿਸਮਾਂ ‘ਤੇ ਪ੍ਰਯੋਗ ਕੀਤਾ ਤਾਂ ਜੋ ਇਹ ਦੇਖਿਆ ਜਾ ਸਕੇ ਕਿ ਕਿਹੜੀ ਕਿਸਮ ਪੰਜਾਬ ਦੇ ਮੌਸਮ ਅਤੇ ਇੱਥੋਂ ਦੀ ਮਿੱਟੀ ਦੇ ਸਭ ਤੋਂ ਅਨੁਕੂਲ ਹੈ।

‘ਵਾਸ਼ਿੰਗਟਨੀਆ ਪਾਮ’ ਨੇ ਬਦਲੀ ਕਿਸਮਤ

ਪ੍ਰਯੋਗਾਂ ਤੋਂ ਬਾਅਦ, ਉਨ੍ਹਾਂ ਨੂੰ ਪਤਾ ਲੱਗਾ ਕਿ “Washingtonian Palm” ਪੰਜਾਬ ਦੀ ਮਿੱਟੀ ਲਈ ਸਭ ਤੋਂ ਉੱਤਮ ਕਿਸਮ ਹੈ। ਸਾਲ 2019 ਵਿੱਚ, ਉਨ੍ਹਾਂ ਨੇ ਦੋ ਏਕੜ ਰਕਬਾ ਪੂਰੀ ਤਰ੍ਹਾਂ ਇਸ ਕਿਸਮ ਲਈ ਰਾਖਵਾਂ ਰੱਖ ਦਿੱਤਾ। ਇਹ ਫੈਸਲਾ ਉਨ੍ਹਾਂ ਲਈ ਇੱਕ ਗੇਮ ਚੇਂਜਰ ਸਾਬਤ ਹੋਇਆ। ਇਹ ਬੂਟੇ ਸਿਰਫ਼ 3.5 ਤੋਂ 4 ਸਾਲਾਂ ਵਿੱਚ ਪੱਤਿਆਂ ਸਮੇਤ 10 ਫੁੱਟ ਤੱਕ ਉੱਚੇ ਹੋ ਜਾਂਦੇ ਹਨ, ਜੋ ਕਿ ਬਾਜ਼ਾਰ ਵਿੱਚ ਪ੍ਰਤੀ ਬੂਟਾ ₹2,500 ਤੋਂ ₹2,800 ਵਿੱਚ ਵਿਕਦੇ ਹਨ। ਜੇਕਰ ਇਨ੍ਹਾਂ ਨੂੰ 5 ਸਾਲ ਤੱਕ ਰੱਖਿਆ ਜਾਵੇ, ਤਾਂ ਇਨ੍ਹਾਂ ਦੀ ਕੀਮਤ ਵੱਧ ਕੇ ₹4,500 ਤੋਂ ₹5,500 ਤੱਕ ਵੱਧ ਜਾਂਦੀ ਹੈ। ਹੁਣ ਤੱਕ, ਇਨ੍ਹਾਂ ਭਰਾਵਾਂ ਨੇ 3.5 ਤੋਂ 5 ਸਾਲ ਤੱਕ ਦੇ ਲਗਭਗ 25,000 ਬੂਟੇ ਵੇਚ ਕੇ ਬਹੁਤ ਵੱਡਾ ਮੁਨਾਫ਼ਾ ਕਮਾਇਆ ਹੈ।

ਦੁਬਈ ਤੋਂ ਮਿਲਿਆ 1 ਲੱਖ ਬੂਟਿਆਂ ਦਾ ਆਰਡਰ

ਨਵੇਂ ਰਿਹਾਇਸ਼ੀ ਇਲਾਕਿਆਂ, ਸ਼ਹਿਰੀ ਕਲੋਨੀਆਂ ਅਤੇ ਫਾਰਮ ਹਾਊਸਾਂ ਵਿੱਚ ਲੈਂਡਸਕੇਪਿੰਗ ਅਤੇ ਹਰਿਆਵਲ ਲਈ ਇਨ੍ਹਾਂ ਬੂਟਿਆਂ ਦੀ ਭਾਰੀ ਮੰਗ ਹੈ। ਪਹਿਲਾਂ, ਇਹ ਭਰਾ ਆਪਣੇ ਬੂਟੇ ਪੰਜਾਬ, ਹਰਿਆਣਾ, ਗੁਜਰਾਤ, ਮਹਾਰਾਸ਼ਟਰ ਅਤੇ ਉੱਤਰੀ ਭਾਰਤ ਦੇ ਹੋਰ ਹਿੱਸਿਆਂ ਦੇ ਵਪਾਰੀਆਂ ਨੂੰ ਵੇਚਦੇ ਸਨ, ਪਰ ਹੁਣ ਉਨ੍ਹਾਂ ਨੇ ਵਿਚੋਲੇ ਖ਼ਤਮ ਕਰਕੇ ਸਿੱਧੀ ਮਾਰਕੀਟਿੰਗ ਸ਼ੁਰੂ ਕਰ ਦਿੱਤੀ ਹੈ, ਜਿਸ ਨਾਲ ਮੁਨਾਫ਼ਾ ਹੋਰ ਵਧਿਆ ਹੈ।

ਇੰਨਾ ਹੀ ਨਹੀਂ, ਉਨ੍ਹਾਂ ਦੀ ਸਫ਼ਲਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਉਨ੍ਹਾਂ ਨੂੰ ਹੁਣ ਸਿੱਧਾ ਦੁਬਈ ਤੋਂ 1 ਲੱਖ ਪਾਮ ਦੇ ਬੂਟਿਆਂ ਦਾ ਇੱਕ ਵੱਡਾ ਆਰਡਰ ਮਿਲਿਆ ਹੈ। ਦਰਅਸਲ, ਜਿੱਥੇ ਰਵਾਇਤੀ ਖਜੂਰ ਦੇ ਰੁੱਖਾਂ ਨੂੰ ਵੱਧਣ ਵਿੱਚ 10-12 ਸਾਲ ਦਾ ਲੰਮਾ ਸਮਾਂ ਲੱਗਦਾ ਹੈ, ਉੱਥੇ ਹੀ ਇਹ Palm Tree 4-5 ਸਾਲਾਂ ਵਿੱਚ ਇੱਕ ਪ੍ਰਭਾਵਸ਼ਾਲੀ ਉਚਾਈ ‘ਤੇ ਪਹੁੰਚ ਜਾਂਦੇ ਹਨ। 

ਘੱਟ ਲਾਗਤ ਅਤੇ ਵੱਧ ਮੁਨਾਫ਼ਾ

ਵਰਿੰਦਰ ਸਿੰਘ ਦਾ ਕਹਿਣਾ ਹੈ ਕਿ ਇਸ ਖੇਤੀ ਦੀ ਲਾਗਤ ਬਹੁਤ ਘੱਟ ਹੈ, ਸਿਰਫ਼ 3.50 ਲੱਖ ਦਾ ਖ਼ਰਚਾ ਹੁੰਦਾ ਹੈ, ਜਿਸ ਵਿੱਚ ਬੂਟੇ ਖਰੀਦਣਾ, ਟ੍ਰਾਂਸਪਲਾਂਟੇਸ਼ਨ, ਛਾਂਟੀ, ਗੋਡੀ ਅਤੇ ਸਿੰਚਾਈ ਸ਼ਾਮਲ ਹੈ। ਇਸ ਰੁੱਖ ਨੂੰ ਸਾਲ ਵਿੱਚ ਲਗਭਗ 20 ਵਾਰ ਪਾਣੀ ਦੇਣ ਦੀ ਲੋੜ ਹੁੰਦੀ ਹੈ, ਪਰ ਮਾਨਸੂਨ ਦੇ ਮੀਂਹ ਕਾਰਨ, ਪਾਣੀ ਦੀ ਜ਼ਿਆਦਾਤਰ ਲੋੜ ਕੁਦਰਤੀ ਤੌਰ ‘ਤੇ ਪੂਰੀ ਹੋ ਜਾਂਦੀ ਹੈ, ਜਿਸ ਨਾਲ ਪਾਣੀ ਦੀ ਖ਼ਪਤ ਵੀ ਘੱਟ ਹੁੰਦੀ ਹੈ। ਦੂਜੇ ਪਾਸੇ, ਜਸਵਿੰਦਰ ਦੱਸਦੇ ਹਨ ਕਿ ਉਹ ਸ਼ੁਰੂਆਤ ਵਿੱਚ ਹੀ ਖਾਦ ਵਜੋਂ ਰੂੜੀ ਦੀ ਵਰਤੋਂ ਕਰਦੇ ਹਨ। ਪੰਜਾਬ ਵਿੱਚ ਬਹੁਤ ਜ਼ਿਆਦਾ ਸਰਦੀ ਅਤੇ ਅੱਤ ਦੀ ਗਰਮੀ ਦੇ ਦੋ-ਦੋ ਮਹੀਨੇ ਛੱਡ ਕੇ ਇਸ Palm Tree ਨੂੰ ਪੂਰਾ ਸਾਲ ਉਗਾਇਆ ਜਾ ਸਕਦਾ ਹੈ।

ਨਵੇਂ ਤਜ਼ਰਬੇ ਅਤੇ ਕਾਰੋਬਾਰ ਦਾ ਵਿਸਥਾਰ

ਪੋਸਟ ਗ੍ਰੈਜੂਏਟ ਭਰਾ ਗੁਰਜੰਟ ਸਿੰਘ ਕਹਿੰਦੇ ਹਨ ਕਿ ਸ਼ੁਰੂਆਤੀ ਦੌਰ ਵਿੱਚ, ਉਨ੍ਹਾਂ ਨੇ ਕੁਝ ਗ਼ਲਤੀਆਂ ਵੀ ਕੀਤੀਆਂ, ਜਿਵੇਂ ਕਿ ਵੱਡੀਆਂ ਬੂਟੇ ਦੇ ਵਿਚਕਾਰ ਹੀ ਨਵੇਂ ਬੂਟੇ ਲਗਾਉਣਾ, ਜਿਸ ਨਾਲ ਨਵੇਂ ਬੂਟਿਆਂ ਦਾ ਵਿਕਾਸ ਰੁਕ ਗਿਆ। ਹੁਣ, ਉਹ ਇੱਕ ਵਾਰ ਪੂਰਾ ਖੇਤ ਖਾਲੀ ਕਰਕੇ ਹੀ ਨਵੀਂ ਪਨੀਰੀ ਲਗਾਉਂਦੇ ਹਨ। ਅੱਜ, ਇਹ ਕਾਰੋਬਾਰ 9 ਏਕੜ ਤੱਕ ਫੈਲਿਆ ਹੋਇਆ ਹੈ, ਜਿੱਥੇ ਉਹ ਪ੍ਰਤੀ ਏਕੜ 5,000 ਬੂਟੇ ਲਗਾਉਂਦੇ ਹਨ ਅਤੇ ਅਗਸਤ ਤੋਂ ਪਹਿਲਾਂ 2 ਏਕੜ ਹੋਰ ਜੋੜਨ ਦੀ ਉਮੀਦ ਹੈ। ਉਹ ਹਰ ਛੇ ਮਹੀਨਿਆਂ ਵਿੱਚ 20,000 ਤੋਂ 25,000 ਬੂਟੇ ਵੇਚਣ ਦਾ ਟੀਚਾ ਰੱਖ ਰਹੇ ਹਨ। 

ਇਸ ਦੇ ਨਾਲ, ਉਨ੍ਹਾਂ ਨੇ ਹੁਣ ‘Bismarckia palms’ ਦੀ ਨਵੀਂ ਕਿਸਮ ਵੀ ਲਗਾਈ ਹੈ, ਜਿਸ ਦੇ ਚਾਂਦੀ ਰੰਗੇ ਪੱਤਿਆਂ ਕਾਰਨ ਥੋਕ ਬਾਜ਼ਾਰ ਵਿੱਚ ਇਸ ਦੀ ਕੀਮਤ ₹10,000 ਤੋਂ ₹15,000 ਪ੍ਰਤੀ ਬੂਟਾ ਹੈ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਸਾਬਤ ਕੀਤਾ ਹੈ ਕਿ ਲੰਮੀ ਉਚਾਈ ਵਾਲੇ ਇਹ Palm Tree ਦੇਖਭਾਲ ਦੇ ਨਾਲ ਬਹੁਤ ਵਧੀਆ ਮੁਨਾਫ਼ਾ ਦਿੰਦੇ ਹਨ।